بلوچستان نا ضلع خضدار ئٹی استو ننکان پاکستانی لشکر اُرا سے آ چھاپہ خلیسہ شش بندغ ءِ دزگیر کریسہ بے ڈس ءُ جاگہ سے آدرینے۔
شابیتی حوال تا رد ئٹ خضدار نا علاقہ گریشگ ئٹی بھلو کچ اسیٹ پاکستانی لشکر چھاپہ خلیسہ باوہ و چار مار تون اوار شش بندغءِ دزگیر کرینے و بے ڈس ءُ جاگہ سے آ درینے۔
دزگیری آن گڈ بیگواہ مروکا بندغ آتا چاہنداری خیر بخش ولد شئے محمد، داد کریم ولد شئے محمد، مقصود ولد شئے محمد، نعیم ولدشئے محمد، شئے محمد و ڈاکٹر کریم بخش ولد بہار نا پِنا مسنے۔
یاتی مرے کہ بلوچستان ئٹ زوراکی نا بیگواہی تا تدینیک ترندی ئٹ مونا بننگ ءُ، زوراکی نا بیگواہی تا بابت ئٹ کاریم کروک تنظیم وائسفار بلوچ مسنگ پرسنز نا رد ئٹ زوراکی نا بیگواہی تا تدینیک اسہ وڑ برجاء ءُ۔ برجاء سال اپریل ئٹ کراچی یونیورسٹی تراک آن گڈزوراکی نا بیگواہی تا تدینی تیٹ ودکی مسنے۔
ایلو کنڈ آن بیگواہ آ بندغ آتا خاہوت آک 45 دے آن کوئٹہ ٹی گورنر ہاؤس نا مونا تولوک برانز کننگ ءُ۔ زوراکی ئٹ بیگواہ مروکا بندغ آتاخاہوت آک تدوکا دے تیٹ برانز کریسہ کسر تے بند کریسر۔