“شال ئنا بشخندہ”
دنکہ پد آہڑ آن
پر نا اولی پُڑی
ڈیہہ ءِ جولا خلوکا
قرار ایتکک
مچے لار ایتکک
عشق ئنا دنکہ استار
گک تارمہ ٹی
بے کسر بے بلد
تینا مونی انوکا گنوک ءِ
کسر شان ایتک
نظر دان ایتک
اتیک منزل آ
دنکہ کلبر نا مشتیٹی گڈ ئس
ہتم نا کلو تون اوار
خوشی و مستی اٹ
ہر ئسے جھمرے
شینک شینک کیک
چنڈک تخک
یا ترڈک مخک
دنکہ سازندہ ئس
سرگم آتا سمندر تیٹی
مہر ئنا تار تارے سریفسٹ
تینا جندے بے خیال کے
عشقٹی بال کے
دنکہ دیگر کنا خلق ئنا
تینا جادو ادا ناز ئتو
کشتہ غا دم تے ساہ
ٹیکی ترسٹ عجب
سارے تینائی کے
وارے تینائی کے
دنکہ شوخ آ غزل
یا کہ زیبا غا نظم آن پد
شاعر ئس
تینا دڑد آتے جٹ ئس
کہ تاہیر ایتک
دتر دیر ایتک
بزغرس دنکہ
سال آتا خواری نا پد
زند ئنا خوشہ غا تے
خرن خنیک
اخہ در خوش مریک
ال صفا مش مریک
اندنے چٹ صفا اندنے
شال ئنا
مست آ بشخندہ یار
شاعر: مرید بلوچ
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔