بلوچستان نا بنجائی شار کوئٹہ ٹی جمعہ نا نن مروک اسہ بمب تراک ئسے ٹی کم و ود اسہ بندغ اس بیران و نو ٹپی مسنو۔
شابیتی حوال تا ردئٹ کوئٹہ نا علاقہ پود گلی چوک آ رکشہ نا خُڑک آ تُرند ءُ تراک اس مسنے۔ تراک نا زد ئٹی بروک آ رکشہ بُھس اندنکہی اُلاخ آک و خُڑک نا ماڑی تے ہم نسخان رسینگانے۔
اسپتال بست و بند نا ردئٹ تراک ٹی ٹپی مروک ءُ نو بندغ ءِ سول اسپتال کوئٹہ آ دننگانے ۔
تراک آن گُڈ پولیس کارندہ و فورسز آتا بھلو کچ اس تدینی نا جاگہ غا سر مریسہ تراک ئنا نوعیت نا بابت ئٹ پٹ و پول بناء کرینے۔
واہم داسکان دا حوال اف کہ تراک نا ٹِک دیر ئس، نئے کہ جلہو نا ذمہ واری ءِ داسکان کَسس ارفینے۔