تہران ئٹی “اخلاقی پولیس‘‘ نا دو آن دزگیر مننگ آن گڈ اسہ ایرانی زالبول ئسے نا مرگ ءِ امریکی وائٹ ہاؤس “ناقابل معافی” پارے۔
امریکی قومی سلامتی نا مشیر جیک سلیوان جمعہ نا دے تینا ٹوئٹ ئٹ پارے کہ ننے ایران ئٹ 22 سالی مہسا امینی نا کہنگ آ بازفریشانی ارے۔ پاننگک کہ اوڑا ایرانی اخلاقیات نا پولیس دزگیری نا وخت بے دادی کریسس۔ اونا خون معاف مفرو۔ نن بندغی حق آتادننگا لتاڑ آتیا ایرانی کوالخواہ تیان حساب ہلنگ نا کاریم ءِ برجاء تخون۔
ایلو کنڈ آن مہسا امینی ءِ دزگیری ٹی خون کننگ نا برخلاف تہران ئٹ بندغ آک برانز بناء کرینو۔ ایرانی حکومت بنجائی شار تہران ئٹانٹرنیٹ ءِ ہم بند کرینے و برانز کروک آتے دزگیر کننگ ءُ۔
حوال تا رد ئٹ تہران ئٹ اخلاقی پولیس بے مناسب نقاب کننگ نا ڈوہداری ٹی 20 سالی مہسا امینی ءِ دزگیر کریسس۔
دزگیری نا وخت آ مہسا آ بے دادی کننگاسس، بے دادی نا سوب آن مہسا نا حالیت باز خراب مس تو پولیس ءِ اودے اسپتال آ دروئی تما۔
تینا رویہ آ پڑدہ شاغیسہ پولیس دعویٰ کرینے کہ مسڑکو ءِ نا گمان آ اُست ئٹ دڑد مسس ہرا نا سوب آن اودے دمدستی اسپتال آ سرکننگاسس ولے رپورٹ آتیٹ پاش مسنے کہ پولیس نا دعویٰ دروغ ئسے۔
حوال تا رد ئٹ پولیس کارندہ آک مہسا امینی نا خراب مروک حالیت ءِ کمار کتویسر۔ اوڑے ساڑی ایلو بندی تا برانز کننگ آن گڈ پولیساودے اسپتال آ اننگ آ بیوس مسس۔
اسپتال ئٹ ڈاکٹر آتا پاننگ ءِ کہ مہسا ءِ اُست ہلنگ و فالج مننگ نا سوب آن او ساہ تسنے۔