جمعہ نا دے نادرست بندغ آک خضدار نا علاقہ زہری ٹی سُم کاری کریسہ اسہ بندغ ئسے کسفیر اندن اسہ بندغ ئسے ٹپی کریر۔
سُم کاری نا تدینی زہری بازار ٹی مونا بس ہراڑے سُم کاری آن حفیظ اللہ، روات خان نا مار مرگ نا گواچی مس اندن سُم کاری نا دک ئٹ بریسہ اسہ کسری ئس ابراہیم عمرانی پِنی ٹپی مسونے۔
جون و ٹپی مروک آ بندغ اسپتال کن دننگار۔ تدینی نا سوب آک دائسکان درست متنو، گیشتر پٹ و پول لیویز کارندہ آک کننگ ءُ۔
ایلو پارہ غان نوشکی آن حوال آک اریر کہ تاڈیز ٹی اُلاخ و موٹرسائیکل نا نیام ئٹ شکست نا سوب آن موٹر سائیکل آ سوار بندغ مرگ نا گواچی مس۔
ایڑے مستونگ آن حوال ارے کہ کھڈ کوچہ ٹی سلاء بند بندغ آک باوہ ءِ خلیسہ اونا 8 سن ئنا مار ءِ بیگواہ کریر۔
حوال تا ردئٹ محمد اسلم، رئیس درانی نا مار ہرا مستونگ آن کھڈ کوچہ کن تینا ہشت سن ئنا چُنا تون اوار ہِننگ ئس ہرادے مکہ ہوٹل نا ہند آ موٹر سائیکل آ سوار بندغ آک ٹپی کننگ آن گُڈ چُنا ءِ بیگواہ کریسہ دریر، اندن چُنا نا باوہ ءِ لیویز فورس نواب غوث بخش رئیسانی ہسپتال آ درے۔