کراچی نا انسداد دہشتگردی نا عدالت کراچی یونیورسٹی ٹی چینی تیا جند ندری جلہو کیس ٹی بلوچ لبریشن آرمی نا راہشون بشیر زیب بلوچ تون اوار 6 بندغ ءِ نروک پاریسہ وارنٹ دزگیری برجاء کننگا ۔
کراچی یونیورسٹی ٹی چینی تیا جند ندری جلہو کیس ءِ انسداد دہشتگردی عدالت بنگ۔ کیس ٹی جندندری جلہو کروک شاری بلوچ نا اَرغ ہیبتان بلوچ تون اوار 6 بندغ آتا پِن آ کریسہ نرِنگ قرار تننگانے ہراٹی بلوچ لبریشن آرمی نا سروک بشیر زیب بلوچ، رحمان گل، خلیل عرف واجہ و میر سفیر اوار ءُِ۔
پولیس عدالت ءِ پارے کہ جلہو کروک شاری بلوچ نا اَرغ اونا کالعدم تنظیم ٹی اواری و ذہن جوڑ کننگ ئٹ اوار ئس اندن دزگیر مروک داد بخش ریکی حوال آتے خلیل، ڈاکٹر ہیبتان بلوچ و بشیر زیب ءِ تِریسہ کریکہ ۔
پولیس نا ردئٹ زیات نروک ڈوہدار ءُ۔ پولیس دوبہ خلکُنے کہ افغانستان ٹی ڈھکیسہ پِن کروک بندغ آک کاروائی کننگ ءُ ۔
تدوکا سال 26 اپریل آ کراچی یونیورسٹی ٹی چینی شاری تیا کروک جند ندری بمب جلہو نا مقدمہ انسداد دہشتگردی تھانہ ٹی انسپکٹر بشارت حسین نا پارہ غان درج کننگاسس ہراٹی تدوکا دے تیٹ انسداد دہشتگردی نا عدالت آن فیصلہ بِنفیسہ بلوچ لبریشن آرمی نا راہشون بشیر زیب بلوچ، شاری بلوچ نا ارغ ہیبتان بلوچ تون اوار 6 بندغ نا وارنٹ دزگیری شینککننگانے ۔
پولیس نا ردئٹ کیس ٹی اسہ ڈوہدار داد بخش دزگیر ءِ اوفک داد بخش ءِ چار جولائی 2022 آ مچھلی چوک ہاکس آن دزگیر کننگ نا دعویٰ کریسُر۔ پولیس نا ردئٹ داد بخش تینتون اوار ڈوہدار ناصر تون اوار چائنیز نیشنلز ءِ ٹِک کننگ نا پاش کننگانے ۔
یاتی مرے کہ پِن کروک کیس ٹی پولیس نا پارہ غان دزگیر کننگ نا دعویٰ کروک داد بخش نا خاہوت داد بخش آ خلوک دوبہ تیان نمن ءِ۔
خاہوت نا پاننگ ءِ کہ شعیب بلوچ نال خضدار آن تعلق تِخوک اسہ خوانندہ ئسے ہرادے 29 اپریل 2022 ء آ سی ٹی ڈی ماری پور کراچی آن دزگیر کریسہ داد بخش نا پن ئٹ پاش کریسہ اودا وے بنیات و دروغ ڈوہ خلیسہ عدالت آن اِرا تُو نا ریمانڈ خواست کننگاسس ۔
شعیب بلوچ نا خاہوت تربت ٹی اسہ پریس کانفرنس ٹی پاریسس کہ او کراچی یونیورسٹی ٹی داخلہ ہلنگ خوائِسس ۔ او اسہ خواری کش و خواننگ نا شونقین خوانندہ ئسے اونا دزگیر کننگ آن اونا تعلیمی زند ضائع مننگ نا خُلیس ءِ ، اِرا تُو نا ریمانڈ و بے دادی آن گُڈ یخیناً اونا ذہنی حالیت شَل مرو۔