جرمنی نا بنجائی شار برلن ٹی ہندی جرمن گل ئنا کنڈ آن ڈیموکریسی اندا دے تیٹ بلوچستان انفو یونٹ نا پن آ اسہ دے ئی مجلس اس اڈ تننگا۔
مجلس اِرا بشخ آ تالان ئس ہراڑے اولیکو بشخ ئٹی پاکستانی لشکر نا کنڈ آن زوراکی نا بیگواہی و بندغی حق آتیا اسہ ڈرامہ و چنکو ڈاکیومنٹری اس مونا ہتنگا۔
ایلو بشخ ئٹی بلوچستان نا ساڑی حالیت آ بلوچ بندغی حق آتا باسک عبداللہ عباس بلوچ شابیتی ئٹ تران کرے و اوار مروکا تا سوج آتا ورندی تس۔
ہیومن راٹس کونسل بلوچستان نا انفارمیشن سیکرٹری عبداللہ عباس پارے کہ بلوچستان ئٹی زند ئنا غٹ شعبہ آتیان تعلقداری تخوکا باسک آک پاکستانی ڈھکوک ادارہ آتا زوراکی تون مون تننگ ءُ و زوراکی نا بیگواہی تا لڑ برجاء ءِ۔
او پارے کہ پن ئنا سی ٹی ڈی نا کمک ئٹ مُست آن دزگیر مروکا بلوچ سیاسی باسک آتے دروغ ئنا مونتس آتیٹ خون کننگ ئٹی ءُ۔
اونا پاننگ ئس کہ بلوچستان آن میڈیا تیوہ بلیک آؤٹ و آرمی نا کنٹرول ئٹی ءِ۔ پاکستان آن اگہ کس بلوچستان نا بابت ئٹ ہیت کے تو اودے ہم خون کننگ مریک۔
او ودیک پارے کہ پاکستان ءِ تروکا جی ایس پی پلس سٹیٹس آ یورپ دوارہ نظر شاغے۔ پاکستان ئٹی دنو قانود ارے کہ ہرا اقلیت آتا و بے وس آ قوم آتا حق آتیان چپ ءُ۔
او اسہ سوج ئسے نا ورندی ٹی پارے کہ جرمن الس تینا حکومت آ زور شاغے کہ او پاکستان ءِ سلاء تننگ بند کے اینو پاکستان اندا سلاء تیٹ بلوچ آتے خلنگ و کسفنگ ءِ۔
مجلس نا ایسر ئٹ آجوئی نا کسر ئٹ شہید مروکا تا عکس آتے نشان تننگا و اوفتے خراج تحسین پیش کننگا۔