برطانوی شہزادہ ہیری نا کتاب ‘اسپیئر‘ مارکیٹ ئٹ بننگ تون اولیکو دے آ 14 لکھ آن زیات کاپی بہا مننگ آن گڈ پوسکنو جہانی ریکارڈاس جوڑ کرے۔
گنیز ورلڈ ریکارڈ نا رپورٹ نا رد ئٹ برطانیہ، امریکہ، کینیڈا ٹی شہزادہ ہیری نا متنازع زند نوشت ‘اسپیئر‘ بہا کننگ نا اولیکو دے آ 14 لکھ 30 ہزار آن زیات کاپی بہا مننگ نا جہانی ریکارڈ جوڑ کرے۔
داڑان مالو کل آن زیات کتاب بہا مننگ نا دا ریکارڈ امریکہ نا مسکوہی صدر باراک اوباما تون ئس، ہرا نا کتاب ‘پرومس لینڈ 2020′ نا8 لکھ 87 ہزار کاپی بہا مسوسر۔
16 بولی تیٹ شینک مروکا دا کتاب 10 جنوری آ مارکیٹ ئٹ بہا مننگ کن مونا ہتنگاسس۔
متنازع زند نوشت نا کاپی تا ہسپانوی ترجمہ ردی ئٹ اسپین بازار ئٹ بسوسس، ہراڑان گڈ کہی ہیت آک مونا بسوسر، داڑان بیدساسپین ئٹ اونا کاپی تے دکان تیان زوو دانگ اینگ کننگا ولے او وخت اسکان دا کتاب میڈیا نا دو آ لگاسس۔
اندا سوب ءِ کہ شہزادہ ہیری نا کتاب ءِ ہلنگ کن بندغ آتا بھلو کچ اس اُست خواہی نا درشانی کرے۔
کتاب نا شینکار پک کریسہ پارے کہ ‘اسپیئر‘ نا بہا مننگ نا اولیکو دے پینگوئن رینڈم ہاؤس نا کنڈ آن شینک مروک کل آن زیات بہا مروکابیدس افسانوی (نان فکشن) کتاب جوڑ مسنے۔
یاتی مرے کہ شہزادہ ہیری تینا متنازع زند نوشت ‘اسپیئر‘ ٹی تینا بھلا ایلم شہزادہ ولیم آ جسمانی جلہو نا دوبہ خلکسس او کتاب ئٹمنانے کہ اونا ایلم اودے زنچخ ئٹ ہلیسہ ڈغار آ بٹیسس ہراڑان اونا مُخ ٹپ مس، جنگ ہموتم ترندی ہلک ہراتم شہزادہ ولیم شہزادہ ہیرینا زائیفہ میگھن مارکل ءِ ‘سرگڑدان‘ و ‘بداخلاق‘ پاریسس۔
410 پنہ نا کتاب ئٹ شہزادہ ہیری اوغانستان ئٹ ڈیوٹی نا وخت آ 25 بندغ نا کسفنگ ءِ ہم منانے۔
او تینا کتاب ئٹ پارینے کہ اوغانستان ئٹ 25 بندغ ءِ کسفنگ آ نہ اودے فخر ءِ و نئے کہ داڑا پشیوان ءِ۔
شہزادہ ہیری تینا زند نوشت ئٹ تینا ایلم و باوہ شہزادہ چارلس تون تعلقداری و برطانوی شاہی خاہوت نا بارو ئٹ کہی اہم ہیت آتے پاشکرینے۔
یاتی مرے شہزادہ ہیری نا کتاب مارکیٹ ئٹ بہا مننگ کن ہموتم مونا ہتنگا ہراتم اونا باوہ شہزادہ چارلس تینا لُمہ آنجہانی ملکہ الزبتھارٹمیکو نا تدوکا سال ستمبر ئٹ 96 سال نا سن ئٹ کذیت آن گڈ برجاء سال مئی ٹی تاجپوشی نا تیاری کننگے۔