جنرل آصف غفور نا گوادر نا الس ءِ تڑی تننگ
ٹی بی پی سرگپ
گوادر ئٹ مَچی ہلوک آتا السی برانز ءِ لتاڑنگ کن پاکستانی لشکر و پولیس تاغت ءِ پاش کاریم ئٹ ہیسر و حق دو تحریک نا سروک خواجہ حسین واڈیلہ تون اوار تحریک نا سد آ باسک آتے دزگیر کننگا۔ ہراڑان گڈ ضلع گوادر نا علاقہ جیونی، پشکان، اورماڑہ، سربندر و پسنی نا حالیت آک کیہی دے اسکان خراب مسر و حق دو تحریک نا راہشون تے دزگیر کننگا ہرا بلوچستان نا جتاء جیل تیٹ بند ءُ و اوفتے بے دادی نا گواچی کننگک۔
گوادر ئٹ چک و تاڑ ءِ کم کننگ کن جماعت اسلامی نا سیکریٹری جنرل لیاقت بلوچ نا سروکی ٹی پاکستانی لشکر نا افسر و حق دو تحریک نا کونسلر آتا نیامٹ گپ و تران مس۔ گپ و تران ئٹ پاکستانی لشکر نا کور کمانڈر کوئٹہ جنرل آصف غفور دا تڑی ءِ تس کہ اگہ گوادر ئٹ داکان پد ہڑتال و تولوک برانز کریرے، گڑا نمے جیل ئٹی شاغوٹ۔ داڑان مالو ہم جنرل آصف غفور پشتون آتے تڑی تریسہ پاریسس کہ جنگ و مابت ئٹی کل جائز ءُ و اونا کور کمانڈر کوئٹہ گچین مننگ آن گڈ بلوچستان ئٹ ورنا تا زوراکی نا بیگواہی تیٹ ودکی مسنے۔
کور کمانڈر کوئٹہ نا بیان نا بلوچستان و تیوہ پاکستان نا سیاسی ٹولی و شخصیت آتا کنڈ آن ترند لوز آتیٹ مذمت کننگک۔ حق دو تحریک نا کونسلر کاکا سلیمان پارے کہ گپ و تران نا وخت آ تحریک نا راہشون تے جنرل آصف غفور پاش ورندی تس ولے تڑی تیان ننے ننا خواست آتیان پدی کننگ کپسہ و ظلم و بے دادی تیٹ ننا تحریک ءِ ایسر کننگ کپسہ۔ بلوچ نیشنل موومنٹ نا سیکریٹری جنرل دل مراد بلوچ تینا بیان ئٹ پارے کہ آصف غفور نا تڑی ننا (بلوچستان) نوآبادیاتی دروشم نا درشانی ءِ کیک۔
پرامن برانز ءِ تاغت نا زور آ ایسر کننگ و پرامن تحریک نا کسر تے کچ ئٹ کننگ بیرہ آصف غفور نا آخہ بلکن تیوہ ریاست و ریاستی فوج ئنا مائنڈ سیٹ ءِ۔ پاکستانی لشکر نا بلوچستان ئٹ لشکر کشی و نواب اکبر خان نا شہادت ءِ بیرہ جنرل مشرف اسکان گنڈنگ نا کوشست کننگا ولے بلوچستان ئٹ راجی آجوئی نا جہد ءِ ایسر کننگ کن داسا ہم تاغت ءِ کاریم ئٹ ہتنگک۔
راجی آجوئی نا جہد اتون تفوک سیاسی ٹولی و ادارہ تیا مالو آن رکھ خلوکے و پرامن برانز نا کسر تے ہم بند کننگک ہرا آجوئی نا جہد اتون تفوک ادارہ تا ہیت ءِ پک کیک کہ پاکستان ئٹ پرامن جہد ئنا ہچو گنجائشت اف و سلاء بند جہد ئٹ بلوچ راجی حق آک (آجوئی) دوئی کننگ مریرہ۔