بلوچستان نا علاقہ قلعہ عبداللہ ٹی دوشمبے نا دے لیویز کارندہ تا گمانی ردئٹ سُم کاری آن اسہ ورنا ئس مرگ نا گواچی مس ۔ تدینی آن گُڈ خاہوت کوئٹہ ، چمن کسر برانز کریسہ بند کرے۔
ذرائع تا ردئٹ لیویز کارندہ آتا و ڈاکو تا نیام ئٹ سُم کاری آن کسری ورنا ئسے سُم ئس لگا ۔ ہراڑان گُڈ اُرا والاک کسر ءِ برانز کریسہ ٹریفک نا ہِن و بر ءِ بند کریر ہرانا سوب کسر نا ہڑتُمکا کنڈ آن اُلاخ آتا مُرغنو قطار ئس لگا۔
اُراوالاک خواست کرینو کہ ایف آئی آر درج کریسہ ڈوہ دار ءِ دزگیر کننگے۔
یاتی مرے کہ ضلع قلعہ عبداللہ ٹی تُدوکا منَہ سال آتیان بد امنی نا تُدینی تیٹ زیاتی مسونے۔ بیرہ تُدوکا اسہ تُو ئسیٹی کسفنگ نا چار تدینی مونا بسونے۔