ماہل بلوچ نا یلہ مفرنگ و بلوچستان ٹی برجاہ بندغی حق آتا لتاڑینگ نا بر خلاف پنجگور ٹی شاری تا پارہ غان دپ درشانی کننگا۔
دا وخت آ برانز کروک آک دوتیٹ ماہل بلوچ و بارکھان ویل ئٹی کسفوک بندغ آتا عکس و پلے کارڈ آتے ارفیسر برانز کروک آک ماہل آ دروغ نا مقدمہ آتے نوشت کننگ و بارکھان ویل ئنا مذمت کریسہ حکومت و ادارہ آتا برخلاف نعرہ خلکر-
برانز ٹی شاری تون اوار خوانندہ تنظیم آک و سیاسی جماعت آتا باسک آک بھلو کچ اسیٹ اوار مسر، برانز کروک آتا خواست اس کہ ماہل بلوچ ءِ دمدستی وڑ ئٹ پاش کریسہ یلہ کیر و بلوچستان ٹی بلوچ زالبول تے رکھینگ تون اوار اوفتا زوراکی ئٹ بیگواہی کروک بندغ آتے پاش کیر۔
ماہل بلوچ نا قانود آن چپ دزگیری و بارکھان ویل ئنا برخلاف جتا خوانندہ و سیاسی تنظیم آتا پارہ غان تیوہ بلوچستان تون اوار پاکستان نا ہم ایلو شار تیٹ دپ درشانی نا کلہو تننگاسس-
برانز کروک آتا خواست ءِ کہ ماہل بلوچ آ خلوک مقدمہ آتے ایسر کریسہ اودے دمدستی وڑ ئٹ آجو کیر و بلوچستان ٹی اشتماعی سزاء نا وڑ ئٹ زالبول تے ٹک کننگ نا عمل ءِ ایسر کیر-
پنجگور برانز کروک آتا پاننگ اس اول نور جان واپس حبیبہ پیر جان و رشیدہ زہری آن گڈ ماھل بلوچ ریاستی زوراکی نا گواچی مس بلوچ زالبول تے زوراکی ئٹ بیگواہ نا گواچی کریسہ بلوچ خلیس ٹی ءِ و بلوچ زالبول تا ننگ ءِ لتاڑینگ ءُ۔
یاتے مرے 17 و 18 فروری نا شام 11 بجہ نا خڑک بلوچستان نا بنجائی شار کوئٹہ آن پاکستانی فورسز اسہ زالبول ماھل بلوچ ءِ اونا چنا تون اوار ارا آن زوراکی ئٹ بیگواہی نا گواچی کریسہ نا درست ءُ جاگہ ئسے آ دریسس اوکان گڈ سی ٹی ڈی ماہل بلوچ ءِ وت کشی تراک پاریسہ اونا دزگیری ءِ پک کریسس-
ماہل بلوچ نا زوراکی ئٹ بیگواہی آن گڈ جتا کیس آتیٹ دزگیر کننگ نا برخلاف بلوچستان نا جتا علاقہ آتیٹ برانز نا لڑ برجاہ ءِ اندن ماہل بلوچ نا خاہوت خوانندہ آتون اوار کوئٹہ ریڈ زون ٹی برانزی کیمپ ہڈ تسونے-