بارکھان نا بیم بش کروک تدینی
ٹی بی پی سرگپ
بلوچستان اِرا دہائی آن انسرجنسی نا پلویڑ ئٹی ءِ و بلوچ راجی تحریک ءِ ایسر کننگ کن پاکستان نا جوڑ کروک پالیسی تیان ہر وخت بیم بش کروک تدینیک مونا بریسہ ءُ۔ زہری خاہوت و ماہل بلوچ کن برانز نا لڑ دائسکان ایسر متوسس کہ بارکھان نا بیم بش کروک تدینی مونا بس۔
بیست فروری نا نن بارکھان ئٹ اسہ دون ئسے آن ہودہ ہژدہ سالی مسڑ اس و اِرا ورنا ءُ مار ئنا جوْنک خننگار، ہرافتیٹ اسہ جوْن خان محمد مری نا چنا نا ءِ، ہرا عبدالرحمن کیتھران نا ذاتی جیل ئٹ قیذ ئس و اِرا جوْن ئنا دائسکان چاہنداری متنے۔ چنا تا خون آن گڈ جوْن آتون اوار مری قبیلہ کوئٹہ ئٹ تولوک برانز کرے، و بلوچستان ئٹ دا تدینی نا بر خلاف ترند ردعمل مونا بس، ہراڑان گڈ پولیس عبدالرحمن کیتھران ءِ دزگیر کرینے۔ داڑان مالو اِرا ہزار چانڑدہ ئٹ عبدالرحمن کیتھران ءِ ذاتی جیل ئٹ بندغ آتے قیذ کننگ و بیدس قانودی سلاء تخنگ نا ڈوہ ئٹ دزگیر کننگاسس و ثبوت مفننگ نا سوب آن عدالت نا کنڈ آن اودے یلہ کننگاسس۔
آجوئی دوست کڑدہ آتا پاننگ ءِ کہ عبدالرحمن کیتھران ءِ پاکستانی لشکر نا سروکی دوئی ءِ و اودے بارکھان ئٹ تحریک آجوئی نا کسر ءِ توننگ نا کاریم تننگانے۔ دا دوبہ خلنگانے کہ عبدالرحمن کیتھران ءِ پاکستانی لشکر نا سروکی ٹی بندغ تے برمتہ کریسہ نجی جیل ئٹ تخنگ و خون کننگ نا آزادی دوئی ءِ۔ خان محمد مری نا چنا تا خون ئنا تدینی اولیکو اف بلکن عبدالرحمن کیتھران اِرا سال مالو صحافی انور کیتھران نا خون اتون اوار بھاز آ تدینی تیٹ اوار ءِ۔
بلوچستان ئٹ بھازی سردار تے حکومتی یا گمانی وڑ ئٹ پاکستانی لشکر نا سروکی دوئی ءِ و سردار تے تینا علاقہ تیٹ بندغ تیا ظلم و بے دادی کننگ کن یلہ ہلینگانے۔ بارکھان آن مالو زہری، جھل مگسی و نصیر آباد ئٹ دنو بیم بش کروک تدینی مونا بسنو۔ بلوچستان ئٹ بھازی سردار تا ذاتی جیل آک اریر ولے حکومت دا تدینی تے توننگ نا جاگہ غا دوبہ دار آتے رکھنگ نا کوشست ئٹی ءِ ہراڑان بلوچستان ئٹ الس ئنا یخین حکومت آن بش مسنے و حق آتے دوئی کننگ نا ذریعہ بیرہ برانز و سیاسی مزاحمت ءِ سرپد مریرہ۔