پڑو ادبی کچاری نا چئیرمین سعید نور تینا شنک کروک بیان اسیٹ پارے کہ براہوئی بولی نا و ادب نا پنی آ شاعر و پڑو ادبی کچاری نا باسک خواجہ محمد مزمل نا زوراکی ئٹ بیگواہی نا مذمت کریسہ پارے کہ خواجہ مزمل بے گناہ ءِ اودے زوت آن زوت یلہ کیر اگہ او راستی قانود آن چپ گنا اسیٹ اوارے گڑا اودے پاش کریسہ اونا برخلاف قانودی کاروائی کیر۔
او پارے کہ ریاست نا دن انگا گام تیان نہ بیرہ بلوچستان نا ادبی ادارہ و نوشتہ کار آک بلکن کتاب ربیدگ ءِ تالانی بشخوک آتیٹ ہم سخت خلیس تالان مریک۔ او پارے کہ سرپد مننگ آن گڈ ہم چم بازی تا رد ئٹ بلوچستان نا ورنا تپہ ءِ نفسیاتی بے دادی کننگک تاکن اوفتا تخلیقی لائخیک و علم دوستی، شعور ساہ ایتے۔
او پارے کہ پاکستان نا آئین نا آرٹیکل 4 ٹی صاف پاننگانے کہ “تیوہ بندغ آک اسہ وڑ ءُ و ننے تیوہ آتون اوار اسہ وڑ ننگ و شرف سگ و اوفتا بابت سوج، اِنصاف نا رویہ ئٹ مروئی ءِ”
اندن 8 آن 28 ٹی بنماسی حق آتا ہیت کننگانے۔ است ہسونی نا ہیت ئسے کہ داڑے لس غریب کن قانود پین و خاص بندغ آتیکن پین قانود ئسے، خاص بندغ آتیکن عدالت آتے شام ئنا نن نیما غا ملیسہ اوفتا مون انگا گناہ تے پیہن کیرا اندن غریب مخلوق کن دے ئنا رژنائی ٹی ہم انصاف مر مر اسکان خننگپک۔
او پین پارے کہ نن بندغی حق آتیکن کاریم کروک تیوہ آ ادارہ آتیان بلوچستان نا ادبی تنظیم و ہر تپہ آن تعلقدار شعرا ادبا آن میڈیا نا وڑ ئٹ خواست کینا کہ او خواجہ مزمل نا یلہ کننگ کن تینا کڑدار ءِ ایسر کیر۔ او پارے کہ بلوچستان نا ادبی ادارہ خاص وڑ ئٹ براہوئی ادبی ادارہ آتا چپی و اوفتا جوڑ کروک دانشور آتا چپی سوج کننگ نا ہیت ئسے۔