طالبان کوالخواک اوغانستان ئٹ مسن تا خواننگ ءِ تالان کروک اسہ منصوبہ ئسے نا سروک ءِ دزگیر کریر۔
اوغانستان ئٹ اقوام متحدہ نا کمکی مشن “یوناما” ٹویٹر آ نوشتہ کرینے کہ “Pen Path” (قلم کسر) تنظیم نا سروک و مسن تا تعلیمنا وکیل مطیع اللہ ویسا ءِ درو کابل ئٹ دزگیر کننگانے۔
اقوام متحدہ نا مشن اوغان کوالخواہ تیان خواست کرے کہ او مطیع اللہ ویسا نا اُرا و اونا دزگیری نا سوب تا بابت چاہنداری ایتر و داہیت ءِ یخینی جوڑ کیر کہ اودے کانودی کمک دوئی ءِ و اونا خاہوت تون حال و حوال برجاء ءِ۔
مطیع اللہ نا ایلم سمیع اللہ “ایجنسی فرانس پریس” ءِ پارے کہ اونا ایلم ءِ شام ئنا نماز آن گڈ مسیت نا پیشن آن دزگیر کننگا۔ مطیعاللہ مسیت آن پیشن پیشتما تو اِرا گاڑی تیٹ بروک کیہی بندغ آک اودے توریر۔ ایلم اوفتیان اوفتا چاہنداری ءِ سوج کرے گڑا اوفک اودےخلکر و زور ئٹ تینتون دریر۔
30 سالی مطیع اللہ ویسا اوغانستان ئٹ خواننگ نا تالانی نا جہد ئٹ اختہ ئس۔ او “پین پاتھ” تنظیم نا بنماس ءِ تخا و اونا سروکی ءِکریسہ ڈیہہ ئٹ 18 لائبریری ٹہیفے۔
مطیع اللہ ڈیہہ ئنا خلقی و مُر ئنا علاقہ تیٹ بند اسکول تے دوارہ ملفنگ ئٹ کڑد سر تسونے۔ اونا این جی او قبائلی سروک آتون ہماوڑدہی کیک۔ کمیونٹی و کوالخواہ تے اسکول تے ملنگ نا سلاہ ایتک۔ و بندغ آتیٹ کتاب و موبائل لائبریری ونڈ کیک۔