بندی
نوشت: زاہد عمرانی بلوچ
دی بلوچستان پوسٹ
شام ئنا مون آ نن اسہ مرغنو چُپی سیتو است ئٹ جاگہ کرسا ئس ای فریشان، فریشان بے پام دانگ ہینگ چک ءِ ہڑسیسا ہُننگ ئسٹ،ہچس الو بیرہ ای ئسٹ، بیرہ ای، ہان ہان بیرہ ای پین کس آہاں، دریچہ آن چنکو چنکو رژنائی نظر بننگ ئس چرک ام مدان مدان آشوتار کرسا است ئٹ لگنگ ئس، دا شوتار ئٹی پاروس کس ئنا توار ءِ، او فریاد کننگ ءِ، دیر اسے ہچ سما اف، دیر نا توار ءِ ہچ سما اف،دریچہ آن مون ءِ کشاٹ دانگ ہینگ ہراٹ کس اف، ہان راستی نا کس اف، تینے آن ہرفنگ ءِ بِناء کریٹ، دا دیر اسے؟ دیر نا توار ءِ؟ پدانتینے تینٹ ورندی ترسا پاوہ کس اف، ہان کس اف، داڑے بیرہ نی اس، ہان کس اف، و پدان تینے آن سوج کیوہ گڑا دا امرو توار اسے؟دیر نا توار ءِ؟
دا توار چٹ است ءِ کشکنگ ءِ، ہان دا کنا وہم ءِ کس اف، دریچہ ءِ بند کیوہ گڑا دا توار بروف، بش مسوٹ دریچہ ءِ بند کریٹ، ولدا ام داتوار بننگ ءِ، داسہ چٹ است ءِ ٹپ کننگ ءِ، رغ اٹ دڑنگ ءِ، دو بٹیٹ دوٹی کنا باکس لگا، تیلی اس لگفیٹ، ای پین جہان ئسے ٹی بسوٹ،رژنائی اسہ پاس تون گیڈ اٹ تالان مس، دامون ہیمون ہراٹ کس اف، پدا ام دا توار النگ اف کنء، اندن لگک کس گٹ ئنا پُر آ کنے کُوککننگ ءِ، مدان مدان آ دا توار کنا خڑکا برسٹ ودنگ ءِ، لگوکا تیلی لگسٹ پینڈی تے سر مس، تیلی ءِ دریچہ آن پیشن خساٹ، وا پدان گیڈاٹ تارمئی تالان مس۔
داسہ کنے آن ہچ سگنگ مننگ اف، خف تا تینا دو ءِ تخاٹ، انگہ دا توار ودسا بننگ ءِ، ای ام گٹ ئنا پر آ پراد اس خلکٹ، انگہ است سُبکمتو، دا چاننگ افٹ کہ دا توار چُنا سے نا ءِ، ورنا سے، پیرو سے نا ءِ، نیاڑی سے نا ءِ، نرینہ سے نا ءِ، ہچ سما، او کنے آ بننگ ءِ، آخرسوب انت ءِ کنا رستی اوسے، سنگت ءِ، سیال ءِ دیر نا، او خدا دا دیر ءِ، انتئے ہوغنگ ءِ، انتئے پراد کننگ ءِ، دریچہ نا رژنائی مدان مدان آچنک مرسا مر مننگ ءِ، تارمئی خنتا مونا تالان مرسا ءِ، اندن لگک کہ کنا خنتا مونو پٹی اس تفنگ ءِ، ای ام ہوغنگ ءِ بناء کریٹ، فریادخلنگ اُٹ، بےسما، بے خد، بے کچ، داسہ کنا گٹ خشک مس، داسہ پراد خلنگ کپرہ دا توار کنا مِلی ٹی جاگہ کرسا ءِ، است چٹ یندمرسا ءِ، کنے ٹی طاغت اف۔
داسہ خن تا مونا مج اس تالان مس، موڷ آن بار خننگک، آخہ دا کس ئنا دروشم ءِ، ہان، دروشم اسے، اندن لگک کہ دڑد نا کوچہ غان دڑدئنا باریم اس ہرفینے، گیمرینگوک، بے وس، کوکار و پراد اٹی ءِ، ہچ سما تمنگ اف انت مننگ ءِ، کنا بت ئنا ست ہنانے، کنے داخہ وس افکہ ای اوڑان ہرفو نی دیر اس؟ ای بُت آنبار ہُننگ اٹ تہ، رست کننگ نا کوشست کننگ اٹ دیر اسے؟ او جن آن بار دروشم ءِ بدل کننگ ءِ،وار اس چناء سے، وار اس پیرو سے، وار اس نرینہ اسے، وار اس نیاڑی سے، چنکو مسڑ سے، مچ عمر ئنا بندغ تا دروشم اٹ بدل کننگ ءِتینے، وختس زالبولی دروشم اٹ وار اس نرینہ ئی دروشم اٹ۔
اسہ گڑاس بدل مننگ اف، کوک و پراد، ایلو امو دروشم نا دڑد، ای چاوہ دا جن اس اف، ای اونا خن تا نظر ءِ شاغاٹ، خنک تہ وختسڈب ہلوک خننگارہ، اندن کہ کس سال آتیان رژنائی ءِ خنپ، وختس خیسن انار آنبار اندن کہ او سال آتیان بےتغ مرے، وختس اندن لگاکہکہ او کس ئسے کن سال آتیان چاری ءِ، وختس ہندن لگاکہ کہ او چنکو چناء سے باوہ نا مہر ئکن ہُروک ءِ، وختس کنے داٹی لمہ سے ناخنک نظر بننگ ئسر ہرا نن نیمہ غا نمازی آ تولوک بڑزا ہننگ ءِ، ایڑ اسے نا خنک ہرا تینا ایلم ءِ پٹیر، باوہ سے نا خنک ہرا تینا مار ئکےکسر آ توروک مریر، اسہ ایڑ اسے نا خنک ہرا تینا ایڑ ءِ پٹنگ ئسر، او غیب مس ای چک ءِ ہڑساٹ اود کنا پدا سلوک کنے آ توار کرے کنےرست کپیسہ، آخہ نی دیر اس، ای نے تپرہ، خدا غا ای نے تپرہ، او پدان غیب مس، توار ام غیب مس، اسہ گوڑیفوکو چپی اس تالانمس، داسہ ای تینا است ئنا توار ءِ ساف بننگ ئسٹ، ای رست کریٹ تا او دیر ئس، ہان، ای رست کریٹ تا، او ای ئسٹ، ہان ای ئسٹ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔