جتائی نا لمبہ – مہروان بلوچ

الّمی خوانبو

جتائی نا لمبہ

نوشت: مہروان بلوچ

دی بلوچستان پوسٹ

نی کنے آن انتئے دُن بے پام اُس ، ابوو! ماہ گُل نا خنک غُلغلو مسر ، ولدا پارے ابا جان!! نی کنا پُوتڑو ہلوکا خنتے آ، کنا ژدغہ مروکاجون آ انتئے ہُرپیسہ؟؟؟ نی کنے آن داخدر بے چکار اُس داخس تو بندغ تینا دژمن آن مفک، ای تو نا مسڑ اُٹ، نا جغر نا ٹکر اُٹ، نا خنتادیدہ، نا ساہ ئنا۔۔۔۔۔۔۔۔۔۔۔۔۔۔۔۔

ہنداخس پاننگ تون ماگل نا خن تیان خڑینک نا اولیکو پُڑی اونا چیچکور آ تما،  بیوسی پُژہ غاتیٹی ہلک ، مودہ غا ڈغار تین مس، آسمانخنا کہ او خڑینک نا اسہ پُڑی اس الوکہ بلکن او نوح ئنا طوفان آن زیات پُرتاثیر ئس کہ نوح ئنا طوفان ڈغار ءِ بے جارات کریسس ولے داخڑینک آسمان نا تمبہ غاتے لڑزفے۔ ماہ گُل خڑینکی آ خن تتون اسہ وار پدا گپ کننگے بناء کرے،

باوہ! نی ہیت کیس یا کپیس، بنس یا بنپیس ای ہیت کروٹ، کنا ہیت ءِ خدا بنپک ولے نے زور ئٹ بنفیوہ تہ،

ابو جی! ای چاوہ کہ داسا او وخت تیر مس کہ نی کنے لولی تسوسہ، کنے بھاکر کریسہ ، ہزار ناز و لاڈ ئٹ مہر کریسہ، ای چاوہ کہداسا او وخت ام اف کہ نی کنتو گوازی کیس، کنا اُست ءِ بشخندہ نا سیبو اس ایتس، ای ہوغوٹ نی کنے دلاسا تروس، ای مخوٹ نیکنے آ ندر مروس، ای چاوہ باوہ، نا مُرغنا جتائی کنے ہیل تس کہ زند تدیفنگ بیرہ مہر و بشخندہ نا پِن اف، ویل آتون مون تننگ ام زندئنا بشخ ئسے۔

کنا پیشانی ءِ اُر! ابووو اسہ وار!! نی اُر کنا پیشانی ءِ، ہندن خننگک کہ غم تا ہُلی سوار آک کنا بخت و تقدیر ءِ، کنا پیشانی ءِ لتاڑانو، کناخنتے اُر نی، اسہ وار بیرہ اسہ وار، ابووووو ماہ گُل نا خن تیٹ دڑد آتا گروک تماسس، اونا ملی اسیکہ گَنگ مس، دوی تہ شل،فریشانی ٹی لوز آک تہ ہندن اڑینگارہ دنکہ سیڷ ئنا توبے جھمر آتیٹ اڑینگسہ تینا روشنائی ءِ گوہک، اونا تہہ ئنا چپی بھاز وداسس،اینو ہمو پیشن بسوس، دڑدی آ چہرہ تون، ڈُکالی آ دروشم تون۔

کنا جغر نا ٹکر! کنا ماہ گلی! ای نا ہیت آتا کڑمبی ٹی گوہاسٹ تینےباوہ غان دا دڑد سگنگ متو، پارے کنا خنتا دیدہ، نی ہرا ویل آتاگواچی اُس، ہرا کوٹور آ پِتاک نا اُست ئٹی لگیرہ، ای چاوہ کہ او بندغ آ اخس دڑدی ءُ ساعت مریرہ، ولے کنے آ انت گدرینگنگ ءِ؟ آسمانکوکار کہ، ڈغار باہ پٹ ءِ، ولے کنا چنا! کنا زہیری ءِ پاننگ کپک، ہر نن ای بُڑزا اُریوہ، آسمان نا اِستار تیا نظر شاغیوہ، پھور ئنا مجلس ءِخنیوہ، کنا اُست آ تفر اس لگک، اسہ پیہنو تہاری اس پلویڑ کیک کنے، کہ دا اِستار تے اسہ جاگہ تُولنگ و کچاری نا حق ارے کنے و کناماہگلی ءِ انتئے اف؟ پنچ مُد ہتم نا گدرینگار، گواڑخ و لال ئنا پھل آتیا مخلوق سیل و سواد کن ہنا، ولے ای تینا اُست ئنا باغ ئٹ رُدوکا پھلءِ، تینا گواڑخ و لال ئنا مٹ ماہگلی ءِ خنتوٹ۔

کنا ماہ گُل!

ای چاوہ نا خڑینک آتا نرخ کنا ہیت آک افس، ولے داسا نی ام بھلن مروس، کنا دڑد و ویل آتا سما مرو نے، قبر آن زیات تنک و تہاراکوٹھی تا کسہ ءِ بنوس، نا خن تیٹ خڑینک آتا نمبی بارپک ولے داڑے بدن نا ٹپ آتا دترک ام بارپسہ، ای نا دروشم ءِ گیرام کرینٹ، ہزارعکس تینا ذہن ئٹ جوڑ کریٹ کہ کنا پُھل انگا چُنا دن مرو ولے اُست اسہ عکس ئسے آ ام راضی متو۔

کنا خنتا دیدہ!! داسا ای ساندہ ہندا سوچیوہ، کہ مرے، مف، کنا چنا نا دروشم کنا ڈیہہ ئنا دروشم ءِ ایتک، اونا دڑد آتا رنگ ام ہمو مروہرا کہ کنا ڈیہہ ئنا ءِ، اونا خوشی تا دروشم ام۔

ہنداخس پاننگ تون ماہ گُل مون آ کرے تینے کہ ہنین انگا باوہ ءِ لکھ مہر ئٹ خمب اس کیو، ہنداڑتون خنک تہ ملنگار، مون تہ خڑینکآتیان پالُن ئس۔


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

پُوسکنا حوالک

خضدار: زوراکی ئٹ بیگواہ کننگوک عبدالوہاب قلندرانی نا لمّہ کذیت کرے

اسہ سال ئس مُست پاکستانی لشکر نا دو آن زوراکی ئٹ بیگواہ کننگوک ورنا عبدالوہاب قلندرانی نا لمّہ کذیت...