کوئٹہ کانگو وائرس نا سوب ورنا اس کسک اندن ایلو زہمی مروک بندغ نا دارو درمان برجاء ءِ۔ طب ئنا چاہندار آک کانگو وائرس ءِ توننگکن لائیو اسٹاک آن تیوہ صوبہ ئٹ اسپرے نا خواست کرینو۔
شابیتی حوال تا رد ئٹ چمن نا ہندی ورنا قصاب نصیب اللہ ءِ 19 اپریل آ تیز ہِڷ، بامس و باء آن دتر بننگ نا سوب فاطمہ جناح ٹی بیسینی ٹوریم اسپتال آ ہتنگا ہراڑے ناجوڑا نا ٹیسٹ کننگا و کانگو وائرس نا پک مننگ آن گڈ ورنا نا دارو درمان ءِ بناء کننگا اسپتال ئٹہفت دے دارو درمان مننگ آن گڈ پن کروک ورنا کسک۔
اسپتال ئٹ المی کاروائی آن گڈ جون ءِ خاہوت نا دو ٹی تننگا دا لڑ ئٹ فاطمہ جناح اسپتال نا ڈاکٹر آتون حال احوال مس تو او پاریر کہاسہ ہفتہ ئسے نا تہٹی کانگو وائرس نا اِرا ناجوڑ ءُ اسپتال آ ہتنگاسس اسہ ناجوڑ نصیب اللہ نا تعلقداری چمن آن و اود قصاب اسئس و ارٹمیکو عبدالولی خان ہرا اوغانستان آن ہتنگا ہڑتوما ناجوڑا تا ٹیسٹ کننگا ہرا ٹی کانگو وائرس نا پک مننگ آن گڈ دارو درمان بناءکننگاسس واہم نصیب اللہ نا پلیٹلیٹس کم مننگ نا سوب حالیت خراب مس و اود کسک اندن ارٹمیکو ناجوڑا نا دارو درمان برجاء ءِ۔
ڈاکٹر آک کانگو وائرس نا نشانی تا بابت پاریر کہ ہراتم پیہن آ دتر ایسر مرے یا بھاز کم مرے گڑا ہِڷ و کاٹم ئٹ دڑد مریک و باء و بامسآن دتر وہیک داڑان بندغ نا مرک ہم مننگ کیک۔ اوفک پاریر کہ دا ناجوڑی ءِ توننگ کن لائیو اسٹاک زوت تیوہ صوبہ نا منڈی و شاریعلاقہ تیٹ اسپرے کے اسہ سوج ئسے آ اوفک پاریر کہ بھازی اوغانستان، چمن، لورالائی، ہرنائی، کوہلو و چاغی تون اوار ایلو علاقہتیان کانگو نا ناجوڑ آک بریرہ ہرافتیٹ بھلا کچ ورنا تا مریک۔
اوفک پاریر کہ مالو ناجوڑا تا پی آر سی کن نمونہ تے کراچی، لاہور و اسلام آباد آ رادہ کننگاکہ ولے داسہ دا آسراتی فاطمہ جناحاسپتال ئٹ ہم ارے۔