ایران حکومت نا برخلاف مروک برانز آتا وخت سکیورٹی فورسز تا برخلاف بے دادی نا دوبہ ئٹ دزگیر مُسہ بندغ ءِ پاہو تسونے۔
احوال تروک ادارہ ‘اے ایف پی’ نا رد ئٹ ایران نا عدلیہ پارینے کہ جمعہ غا مُسہ بندغ ءِ مہسا امینی نا مرک ئنا برخلاف برانز آتیٹ سکیورٹی فورسز تا برخلاف بے دادی نا ڈوہ دار مننگ آ سزا تننگا۔
عدلیہ میزان آن لائن نیوز ویب سائٹ نا پاننگ ئس کہ ماجد کاظمی، صالح میر ہاشمی و سعید یغوبی ءِ اصفہان شار ئٹ برانز نا وخت سلہہ توننگ آ ‘محاربہ’ یا ‘خدا نا برخلاف جنگ’ ئنا ڈوہ دار پن کننگاسس۔ دا برانز ئٹ سکیورٹی فورسز تا مُسہ کارندہ کسفنگاسر۔
جمعہ غا تروک پاہو آن گڈ برانز آتیا مروک سزائے مرک آتا کچ ہفت اسکان سر مسونے۔ ماجد کاظمی، صالح میر ہاشمی و سعید یغوبی ءِ تدوکا سال نومبر ئٹ دزگیر کننگاسس اندن اوفتے جنوری 2023 ئٹ مرگ ئنا سزا بِنفنگاسس۔
داڑان مالو امریکہ ایران آ زور شاغاسس کہ او تدوکا سال دزگیر کروک مُسہ بندغ نا سزائے مرگ آ عمل درآمد ءِ تورے۔
امریکی محکمہ خارجہ نا ترجمان ویدنت پٹیل پنچ شمبے آ صحافی تتون ہیت کریسہ پاریسس کہ ایرانی شار ماجد کاظمی، صالح میر ہاشمی و سعید یغوبی نا سزائے مرگ آ عمل درآمد کننگ بندغی حق آتا بے شرفی آنبار مرو۔
تدوکا سال مہسا امینی پنی ءُ زالبول ئسے نا پولیس دزگیر ئٹ مرگ ئنا برخلاف تیوہ ایران ئٹ برانز مسوسس ہرافتے ایسر کننگ کن حکومت کیہی بندغ تے دزگیر کریسس۔
بندغی حق آتا جہانی گل ایمنسٹی انٹرنیشنل چار شمبے آ اسہ بیان اسیٹ پاریسس کہ ایران نا سرکاری میڈیا ٹی ہر مُسہ بندغ نا ڈوہ تا بابت منوک بیان تے شینک کننگ آن گڈ سپریم کورٹ ہر مُسہ بندغ نا سزائے مرگ ءِ برجاء تخا۔
ایمنسٹی انٹرنیشنل نا رد ئٹ چار شمبے آ ہر مُسہ بندغ نا خاہوت آتے اوڑدہی کننگ نا موکل تننگا و دا پاننگاسس کہ دا اوفتا گڈیکو اوڑدہی ہم مننگ کیک۔
دے ٹکی نیام ئکن ایمنسٹی انٹرنیشنل نا ڈپٹی ڈائریکٹر ڈیانا التہاوی اسہ بیان اسیٹ پاریسس کہ ایران نا عدالتی بست و بند ئٹ گوڑیفوک وڑ ئٹ ہر مُسہ بندغ نا برخلاف مقدمہ کننگا و اوفتے سزا بِنفنگا۔
او ودیک پارے کہ سر و سوج نا وخت آ ہر مسٹ آ بے دادی، زوراکی ئٹ بیان ہلنگ، شاہدی تا کمبوتی و انصاف نا وڑ ڈول تیان چھپ مننگ نا نزوریک انصاف تروک مقدمہ نا شڑط آتے پاش بے پام کننگ نا اسہ پین مثیال ئسے۔
یاتی مرے کہ مہسا امینی نا مرگ ئنا برخلاف تیوہ ایران ئٹ کیہی تُوہ تے اسکان برانز تا لڑ برجاء مس ہرافتا وخت کیہی برانزی تتون اوار سکیورٹی فورسز آک ہم مرگ ئنا گواچی مسوسر۔