سئے فریقی وزرائے خارجہ مجلس
ٹی بی پی سرگپ
ہفت مئی 2023 آ چین، پاکستان و افغان وزرائے خارجہ نا پنچمیکو سئے فریقی مجلس اسلام آباد ئٹ ہڈ تننگا، ہر مسٹ انگا فریق آک علاقائی حوالکاری تا بنجاہ نا دروشم ئٹ افغانستان نا لائخی تے تیوہ وڑ ئٹ کاریم ئٹ ہتنگ نا تینا ارادہ نا درشانی کریر و بیلٹ اینڈ روڈ انیشیٹو (بی آر آئی) نا رد ئٹ سئے فریقی کمک ءِ مُستی دننگ و سی پیک ءِ افغانستان اسکان اواری ئٹ شابیتی تننگ نا ارادہ کریر۔
افغان طالبان نا عبوری وزارت خارجہ نا نائب ترجمان حافظ ضیاء احمد سئے فریقی وزرائے خارجہ مجلس ئٹ پارینے کہ افغانستان ملٹی بلین چین پاکستان اکنامک کوریڈور ئٹ اوار مننگ نا فیصلہ کرینے، ہراڑان ڈکالی ٹی پلویڑ ڈیہہ ءِ تجارت نا بنجاہ جوڑ مننگ و سرمایہ کاری نا کنڈ آ ہتنگ ئٹ کمک رسینگو و میگا انفراسٹرکچر پروجیکٹ ئٹ اوار مننگ نا فیصلہ طالبان بست و بند ئنا جنگ زدہ ڈیہہ ئٹ پیشن نا سرمایہ کاری ہتروک ارادہ نا بشخ ئسے، ہرا افغانستان ئٹ تاغت، ریلوے و ایلو تلہ تیٹ جتاء منصوبہ تے ہتنگ ئٹ کمک کرو۔
سئے فریقی وزرائے خارجہ مجلس، چین ئنا وزیر خارجہ چن گینگ نا منت آ مس تانکہ اسلام آباد و کابل نا نیام ئٹ سلامتی نا بابت خُلیس تے مُر کننگے، ہرا بیجنگ نا بیلٹ اینڈ روڈ انیشی ایٹو نا کسر ئٹ اڑاند ءُ۔ صحافی و جاچ ہلوک عبدالباسط خان نا پاننگ ءِ کہ پاکستان ئٹ چین اکن تیوہ غاتیان بھلا سکیورٹی خُلیس بلوچ آجوئی دوست ٹولیک کو، ہرا بیجنگ ءِ خبڑدار کریسہ کرینو کہ او بلوچستان نا شورش زدہ غا صوبہ ئٹ تینا سرمایہ کاری آ دوارہ پام ایتے۔ چین خاص وڑ ئٹ بلوچ لبریشن آرمی نا جند ندر اسکواڈ مجید بریگیڈ نا بابت خُلیس ئٹی ءِ۔
بلوچ تحریک نا راہشون ڈاکٹر اللہ نذر ہم جہاں ءِ چین ئنا مسخت آتیان خبڑدار کریسہ پارینے کہ “بلوچ تینا راجی رکھ اکن پاکستانی لشکر نا برخلاف جنگ کننگ ئٹی ءِ اندن گوادر ئٹ چینی لشکر (پیپلز لبریشن آرمی) نا ساڑی مننگ علاقائی و جہانی تاغت آتیکن اسہ پاش ءُ بھیم ئسے و اگہ اوفک داڑا پام تتور گڑا او الم پشیوان مرور۔”
چین تینا مفاد آتا رکھ اکن خطہ نا جتاء ڈیہہ تیٹ زرگزرانی و سفارتی تعلقداری تے سوگوْ کننگ ءِ و خطہ نا ہرا ڈیہہ تیٹ بلوچ آک باہوٹ ہلکنو و ہرافتیان کمک نا اُمیت تخیرہ، او ڈیہہ تتون چین ئنا خڑکیک ودنگ ءُ ہرا بلوچ راجی تحریک نا سختی تیٹ ودکی کننگ کیرہ ولے بلوچ ویل ءِ ایسر کننگ آن بیدس بلوچستان ئٹ سرمایہ کاری نا منصوبہ غاک رکھوک افس، بلوچ راجی تحریک نا برخلاف پوسکن ءُ محاذ جوڑ کننگ نا جاگہ غا چین بلوچ تحریک تون تفوک ادارہ تون سیدھا گپ و تران کے و ایمنی گپ و تران نا پارہ غا گام ارفے ہرا ہڑتوما تاغت آتیکن جوانو فیصلہ اس مرو۔