بلوچستان نا ضلع پنجگور و تربت ئٹ پاکستانی لشکر ءِ جلہو تیٹ ٹک کننگانے۔
استو پنجگور شار ئٹ گریڈ اسٹیشن آن خڑک ٹہیفوک پاکستانی لشکر نا چوکی ءِ نادرست بندغ آک ٹک کریر و نرار۔ حوال تا رد ئٹ جلہو نا وخت تراک و سم کاری نا توار ہم بِننگانے۔
دا جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے ننا سرمچار آک استو پنجگور ئٹ گریڈ اسٹیشن آن خڑک ٹہیفوک کوزہ گیر پاکستانی لشکر نا چوکی آ جلہو کریر، سرمچار آک گرنیڈ لانچر ئٹ چوکی آ کیہی گولہ تے خلکر ہرافتا سوب دژمن ءِ جانی و مالی نسخان تیتون مون تروئی تما۔
جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک۔ کوزہ گیر لشکر نا تیوہ پیش تمنگ اسکان ننا کاروائیک برجاء مرور۔
ایلو پارہ غان تربت نا علاقہ آبسر ئٹ حیات بلوچ نا شہادت ہند آ ٹہیفوک پاکستانی لشکر نا چوکی ءِ جلہو ئٹ ٹک کننگا۔ کوالخواہ تا رد ئٹ نادرست پارہ غان پاکستانی لشکر آ مُسہ راکٹ خلنگا۔ واہم نسخان تا بابت کوالخواک ہچ ءُ شابیتی احوال اس تیتنو۔
پن کروک جلہو نا ذمہ واری ءِ بلوچ آجوئی دوست سلہہ بند گل بلوچستان لبریشن فرنٹ نا ترجمان میجر گہرام ارفینے۔
میجر گہرام پارے کہ سرمچار آک استو دئے بجہ غا کیچ نا بنجاہی شار تربت ئٹ پاکستانی لشکر نا اسہ چوکی ئسے آ راکٹ آتیٹ جلہو کریر۔
ترجمان پین پارے کہ سرمچار آک تربت نا علاقہ آبسر ئٹ فوجی چوکی آ مُسہ راکٹ خلکر، ہراڑان چوکی ٹی ساڑی مُسہ کارندہ مرگ ئنا گواچی و اِرٹ ٹپی مسونو۔
او پارے کہ دا چوکی ہمو جاگہ غا ٹہیفنگانے ہراڑے پاکستانی لشکر بلوچ خوانندہ حیات بلوچ ءِ ہلیسہ اونا لُمہ باوہ نا مونا سم کاری کریسہ شہید کریسس۔ حیات بلوچ نا خن تے اونا لُمہ نا گُد ئٹ تفیسہ سم تے چنڈیسہ پاکستانی لشکر بے دادی نا مثیال آتے جوڑ کریر۔
میجر گہرام پارے کہ بی ایل ایف دا جلہو نا ذمہ واری ءِ ارفک۔ دا جلہوک بلوچستان نا آجوئی اسکان برجاء مرور۔