سفر زند و شاعری – 2 | نزار قبانی – عتیق آسکوہ بلوچ

الّمی خوانبو

سفر زند و شاعری

نوشت: نزار قبانی | مَٹ: عتیق آسکوہ بلوچ

ارٹمیکو بشخ

شاعری۔۔۔۔۔ کنا شرف

کنا تعلقداری اسہ اندنو راج ئسے آن ءِ ہرانا ساہ ہلنگ ئٹ شاعری گوفوک ءِ۔ شاعری آن وہ زلف آتے بیرفک و شاعری بینک۔ ننا رہی آ پوسکن ودی مروک چُنا اندنو پاڷ کنیک ہراٹی شاعری چس اوار مریک۔ کنا ڈیہہ ئنا تیوہ غا ورناک تینا اولیکو مابتی درشان تے شاعری بولی ئٹ نوشت کیرہ۔ کنا وطن نا تیوہ غا کہوک آک اندنو سنگ مرمر نا شیف آن کارہ خاچرہ ہراڑا شئر نوشتہ مریک۔ کنا وطن ئٹ کس ئسے نا شاعر مننگ معجزہ اس اف، آن اونا شاعر مفننگ اسہ معجزہ ئسے۔

نن شاعری نا پلویڑ ئٹی اُن و نظم نوشتہ کننگ آ بے وس اُن؛ اسُل اندن دنکہ سرزمین مصر نا کُٹ پمبہ آن اسٹ ءِ، سزمین شام نا کُٹ غلہ و سرزمین عراق ہِلار آن پُر ءِ۔ ننے آ شاعری نا حکمرانی ءِ، دنکہ ہالینڈ آ سمندر نا و ہمالیہ نا ٹیڑ تیا برف نا۔ اندا سوب ءِ کہ ای شئر نوشتہ کننگ ءِ بے سواد یا قسمتی کاریم اس سرپد مفرہ۔ ہراتم ای شئر نوشتہ کیوہ گڑا میراتی و نسلی قانود تا مون آ کاٹم شیف مریوہ و دیہاڑ نا پرمان نامہ ایتوا۔ لندن نا ریجنٹ اسٹریٹ یا پیرس نا شانزے لیزے سڑک آن ایمون مریسہ کنا ڈول ہمو خلقی عاشق نا ڈول مریک ہرانا ملکیت، جہان نا گچینی تیان، بیرہ اونا عبا و اونا تینا ساہ مریک۔

انت عرب آ دا اللہ نا نعمت ئسے کہ اوفتا گُٹ آک شاعرانہ ڈول ہنین توار ءُ، یا گڑا ساندہ ئی لعنت ئسے ہرا اوفتیتون لچوک ءِ؟ دنو بندغ ہم ارے ہرا شاعری ءِ عرب کن لعنت خیال کیرہ، یعنی دا ہمو حشیش ءِ ہرا اوفتے نشہ اٹ پلویڑ کروک ءِ، اوفتا ملی تے شَل کرینے، و اوفتے زمانہ نا ریل گاڑی نا سواری آن تورینے۔ ای دا دلیل ءِ نمن کیوہ و جاحظ نا دا قول تون امنائی کیوہ کہ “شاعری ہی عرب نا فضیلت ءِ۔” داڑے فضیلت آن مراد بندغ تون ساڑی تیوہ غاتیان پاک آ گڑا ءِ و اونا رہی آ تیوہ غاتیان بھلا شرف ءِ۔ راج اکن شاعری، دروشم و مثیال نا ڈول ءِ ہرانا گروشک راج ئنا گروشک و تاموری راج ئنا تاموری تون تفوک ءِ۔ دا ہیت رد ءِ کہ ننا ماندہ ئی ننا شئری ماندہ ئی نا سوب آن ءِ، بلکن سہی ہیت دادے کہ ننا شاعری ہم ہمو وخت ماہگیری مس ہراتم نن تینٹ ماہگیری دور ئٹ پیہان۔

عرب تاریخ نا عظم آ زمانہ غاک عظیم ءُ شاعری ودی کریر و پد تموک زمانہ پد تموک شاعری ءِ ودی کرے۔ اندا حساب یونانی و رومی ادب آ ہم تولک، انتیکہ شاعری مملک نا تالانی و اونا شابیتی است خواہی تون گنڈوک ءِ۔ اندا خاطر گناہ شاعری نا آخہ بلکن ہمو بندغ آتا ہرافک اودے نوشتہ کیرہ۔ جاہلی دور نا بندغ آک ہمون ءُ شاعری کریر دنکہ اوفک تینٹ ئسر، اُمویک تینا ساڑی حالیت نا شئر پاریر و عباسیک تینا ڈول شاعری کریر۔ شراب ساندہ شراب مریک، بیرہ پیمانہ مٹ مریک۔


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

پُوسکنا حوالک

خضدار: زوراکی ئٹ بیگواہ کننگوک عبدالوہاب قلندرانی نا لمّہ کذیت کرے

اسہ سال ئس مُست پاکستانی لشکر نا دو آن زوراکی ئٹ بیگواہ کننگوک ورنا عبدالوہاب قلندرانی نا لمّہ کذیت...