بلوچستان نا ضلع نوشکی ٹی سلہہ بند بندغ آک پاکستانی لشکر ءِ جلہو ئٹ ٹِک کرینو۔
شابیت احوال تا ردئٹ نوشکی اڈہ نا ہند آ مروک ایف سی نا بنجائی کیمپ نا مونا ایف سی کارندہ تے نا درست سلہہ بند بندغ آک ٹک کریر ۔
ذرائع نا ردئٹ ایف سی کیمپ نا مونا مسہ کارندہ سلوک ئسر اوفتے سلہہ بند بندغ آک ٹک کریر ہراڑان ہمو مسہ کارندہ کھسکر و ٹپی مسر ۔
جلہو ءِ کوالخواہ پک کرینو ہرافتا رِدئٹ جلہو ئٹ اِرا کارندہ زیات ٹپی مسونو۔
یات مرے کہ پن کروک علاقہ ٹی بلوچ آزادی دوست سلہہ بند تنظیم آک کاریم کننگ ءُ۔ 29 نومبر آ نوشکی ٹی بلوچ سرمچار آک زرین جنگل نا ہند آ گھیرہ خلکر و ہمو وخت لیویز فورس نا چوکی ءِ تینا کوزہ ٹی ہلکر۔
او جہلو نا ذمہ واری بلوچ لبریشن آرمی ارفیسہ پارے کہ سرمچار آک زرین جنگل نا ہند کسر آ مروک قابض پاکستان نا لیویز فورس نا اسہ چوکی ءِ کوزہ ٹی کریسہ ساڑی کارندہ آتے دزگیر کریر ۔ سرمچار آک لیویز فورس نا سلہہ تے و گیشتر فوجی گِڑاتے ہم تینا کوزہ ٹی کریر واہم کارندہ آتے بلوچ مننگ نا خاطر اوکان پد رکھیسہ یلہ کننگا ۔
اوفتا پاننگ ئس کہ اندا وخت سرمچار آتا اسہ جتاء ٹولی اس کسر آ اسہ گھنٹہ آن زیات گاڑی تا سنیپ چیکنگ کریر اندا وخت سرمچار آتا مسٹمیکو ٹولی اس لٹ و پُل کروک کمپنی ئسے نا پروجیکٹ آ کاریم کروک پنچ کارندہ ءِ دزگیر کریر و کمپنی نا مشینری ءِ خاخر تریسہ بھس کریر ۔ پن کروک دزگیر مروک کارندہ آتیان سر و سوج برجاء ءِ ۔
واہم اینو نا مروک جہلو نا ذمہ واری ءِ دائسکان کس ارفتنے ۔