پوسکنا سال نا بناء – ٹی بی پی سرگپ
پوسکنا سال نا بناء بلوچستان ئٹ آجوئی نا سلہہ بند محاذ نا پارہ غان پاکستانی لشکر آ اسہ بھلو جلہو اسیٹ مس۔ چار جنوری آ تربت نا خڑک ئنا علاقہ بہمن ئٹ بلوچ لبریشن آرمی نا جند ندر یونٹ مجید بریگیڈ پاکستانی لشکر نا قافلہ ئٹ اوار بس آ بھیم بش کروک جند ندری جلہو اس کرے، ہرانا سوب آن چل و ہفت کارندہ مرگ ئنا گواچی، و سی آن زیات ٹپی مسر و کیہی گاڑیک ہم بھس مسر۔
خدو پاکستانی لشکر و چینی سرمایہ کار آتیکن بھاز سخت ءُ سال اس مس، و تیوہ بلوچستان ئٹ بلوچ لبریشن آرمی و بلوچستان لبریشن فرنٹ نا کاریم تیٹ بھاز ترندی بس۔ بلوچستان نا بیست و پنچ ضلع تیٹ سلہہ بند تنظیم آک نو سد و سی و ہشت جلہو کریر، ہرافتیٹ اسہ ہزار آن زیات بندغ مرگ ئنا، شش سد و ہشتاد و نو بندغ ٹپی مسر، و بھلو کچ ئسے آ مالی نسخان رسینگا۔
اِرا ہزار بیست و چار بلوچ لبریشن آرمی نا عزم و طاغت نا درشانی نا سال ئس، ہراتم او آپریشن ہیروف ئٹ بلوچستان نا اہم ہند آتے کوزہ کرے، آپریشن زرپہاز ئٹ گوادر و کیچ ئٹی اہم عسکری تنصیبات آتے ٹک کرے و کراچی ہوائی اڈہ کون آ نازرک ہند آچینی سرمایہ کار آتے بھلو نسخان تس۔
خدو نا جلہو تیان و پوسکنا سال نا بناء ٹی جند ندری جلہو آن پاش مریک کہ اِرا ہزار بیست و پنچ ئٹ مجید بریگیڈ نا مرگ ئنا گواچی کروک و غنجل جلہوک برجاء مرور۔ آجوئی کن کاریم کروک سلہہ بند تنظیم آک تینا طاغت نا تیوہ درشانی کریسہ کرور، ہرافتا سوب آن بلوچستان ئٹ چین ئنا مفاد آک و پاکستانی لشکر گیشتر بے رکھوک مرور۔