شیرزال آ شاری | گنجل بلوچ – مٹ: گندار بلوچ

شیرزال آ شاری

نوشت: گنجل بلوچ
براہوئی مٹ: گندار بلوچ

دی بلوچستان پوسٹ

کنتو لوز اف کہ ای نے بیان کیو۔ لوز آک بھاز چُنک محسوس مریرہ، اسُل کم۔۔۔ اندن کہ بولی آ خُشکاوہ تمِک ہراتم ای نے لوز آتیٹ بیان کننگ نا کوشست کیوہ۔
و نی ہم دا ہیت ئے چاسہ
کنے تینا اولیکو چھٹی یات بریک۔ ہرادے ای نا شہیدی آن گُڈ بناء کریٹ و اپریل 2023 ٹی ایسر کریٹ، او وختا سال ئس لگا نیکن گڑاس لکھنگ آ۔ و ہموتم آن پد ای دوارہ لکھتنوٹ۔
دانا بیرہ اسہ سوب ئس ءِ:
نے لکھنگ منکن اف
و ای بھیرو کیوہ۔۔۔
نے لکھنگ کن ہم دتر تروئی تمک
بس۔۔۔

زیبل آ شاری، دا جنوری 2025 نا اولیکو تاریخ اس، پوسکنا سال ئنا اولیکو دے۔
سہی، دا ہم اسہ مخنگ نا ہیت ئس ءِ۔۔۔ انت؟ پوسکنا سال؟ گواچنی؟
نن کن پوسکنا سال بیرہ کیلنڈر نا بدل مننگ ءِ۔ اسہ پین نمبر ئس۔ تینے ٹی پین ہمت مُچ کننگ نا اسہ پین چَرخ ئس۔
خون و زوراکی نا بیگواہی تا پین حوال سگنگ کن۔
وخت وخت نن دا ہمت ئے گوئنہ۔
وخت وخت نن بیرہ نشان ایتنہ۔۔۔ تینے پانہ کہ جنگ ئٹ دُن مریک۔
ہمر کہ پارہ، “جنگ اندن مریک”۔
ایسر ئٹ ننا زند پین ہمت ودی کننگ نا عمل ءِ بس۔
جون تِہ مُچ کننگ،
ایسکان کہ ننا جند آک جون جوڑ مرین۔

زیبل آ شاری
داسا جنوری نا پنچ تاریخ بس۔ پوسکنا سال ئنا بیرہ چھار دے گدرینگانے۔
اسہ پین مخہ نا ہیت ئس۔
اندن کہ ای نے مُست پاریٹ۔۔۔ نن کن، پوسکنا سال ئنا ہچ مطلب اف۔
بیرہ ہمت کننگ و ہمت ئے گوئنگ۔
بس انداخس۔
کنے موکل ایت کہ ای نے پاو ای ارانگ اُٹ۔۔۔ اسہ کار (اُلاخ) ئسے ٹی، جاگہ ئس ہِننگ اُٹ۔ اسہ سنگت ئس کنے آ ہکل نا بیان ئس راہی کرے، اسہ جند ندر ئسے نا عکس ئتون اوار۔ بہار۔
ہمو ورنا غا خنک۔۔۔
ہرا اسہ وخت ئسے ٹی کیہی تُغ، رنگ و سوغند آتِہ خناسُر۔
دا ورنا درو تربت ئٹ اسہ جلہو ئس کریسس۔۔۔
بہمن ئٹی اسہ بس (اُلاخ)، دشمن کارندہ غا تیا۔
او کیہی تِہ مرگ ئنا گواچی کرے۔
مگہ دا ہیت آ ای خوئشی کیو؟
آخہ۔ ای کننگ کپرہ۔
دڑد کنا گُٹ ئٹ لوپ مس۔۔۔ او خُدا، دا دڑد کنا ساہ ئے بند کرے۔
خڑینک آک بتور۔
او بس کنا گُٹ ئٹ سلیسُر۔۔۔ کچَو و دڑدی۔
ای ہوغاٹ، چُپی ٹی، اندن کہ اسہ پَٹ ئسے نا باسُنی کنا گؤر ئٹ جہی مس۔
ای کھڑکی ئے ملاٹ، ساہ ہلنگ نا کوشست کریٹ۔
پیشن جہان روان اس، ہلہلئی ٹی، ہر اسہ گڑا غان بے چکار۔
اسہ رکشہ چلفوک ئس موٹر سیکلیئو سے آ چِھڑا۔
اسہ فینسی کار ئسے نا خواجہ ئس بیش گاڈو چلفوکا ئے دعا تس کہ او کسر ئے بند کریسس۔
ہر اسہ بندغ جاگہ نہ جاگہ ئس سر مننگ کن بے جارات اس۔
و ایڑے ننا کُنگُر آک، دلیر آک۔
ہرافتا ورنائی انداخس روشن اس کہ اوفتا لمّہ غاک سیر انگا خن ئٹ اوفتے ہُننگ نا جیرت کتورہ۔۔۔ ہرافتا لمّہ غاک خُلیسُرہ کہ اوفتا مہر آن ہم اوفتے نظر لگنگ کیک۔
ولے دا مڷ آک
تینا سینہ غا تیٹ تراکی شورہ تخرہ۔
اوفتا بدنک چُنڈ چُنڈ مریرہ۔
کیہیک بیدس گور و بیدس کفن آن کہ ہرا اوفتے جہی کیر۔
انت مہر ئس ءِ۔
امرو ظالمو جنگ ئس ءِ۔
و شاری۔۔۔
نے سما ئے کُل آن گندہ انت ءِ؟
دا ایسر اف۔
دا گُڈی دم اف۔
ایسر تو مُستی بروئی ءِ۔
و ولدا نی کنا اُستا بریسہ۔
ای تینے دلاسہ تننگ نا کوشست کیوہ۔
اگہ اسہ لمّہ ئس۔۔۔
ہرا تینٹ اسہ پورو ءُ جہان ئس ءِ۔۔۔
تینے دا مزل کن ندر کننگ کیک۔۔۔
گُڑا مننگ کیک۔۔۔
مننگ کیک دا مزل الم برو۔
مننگ کیک دا مزل ساندہ کن سلو۔
مننگ کیک دا دشمن ئے ساندہ کن بےجارات کرو۔

زیبل آ شاری،
کُل آن دلیر آ نیاڑی ہرادے ای چاوہ۔
اینو جنوری نا سی و یک تاریخ ءِ۔
ویگہ نا 5:51 ءِ
ای دوارہ نیکن لکھنگ اُٹ۔۔۔ جنوری نا پنچ تاریخ آن پد ولدا۔
کنا اسہ دو ئس ٹپی ءِ۔ ای ہڈ آتا ڈاکٹر ئسے آ ہِننگ اُٹ۔
نے سما ءِ دا بھلا شار تیٹی ٹریفک امر ءِ۔۔۔
ساہ ئے بند کروک۔
ای گھٹ مسونُٹ۔ ہچو سُر پُر ئس اف۔ ہچو تہو ئس اف۔
دا حالیت ئٹ ای اسہ گڑاس کننگ کیوہ کہ استاد میر احمد نا خلوکو شئیر ئس خلیو۔
بس دا جنجال ئے اسہ پاس ئس استان دننگ کن۔
بس انداخس اس کہ۔۔۔
“نی شارُل۔
دا شئیر تو اسُل کنا بنوکا شئیر تیٹ الو۔
ای پین گڑاس بِننگ اسوٹ۔ کہ نا گمان آ دا بس۔۔۔
گمان آن چَپ، بیدس کنا ہتنگ آن۔
و دا ساندہ نے کنا اُستا شاغانے۔

تو بس ای ہم۔
تینا فون ئٹ نوٹس ئے ملاٹ، اسہ دو ئٹ لکھنگ بناء کریٹ۔
ایلو دو کنا ساٹھ کروک ءِ۔ فون ئے جوانیکا توننگ کپک۔
بس نیکن اسہ عکس ئس جوڑنگ ءِ۔۔۔
ای رکشہ ئٹ تولوک اُٹ، میر احمد نا شئیر ئس بِننگ اُٹ،
راستیکو دو ئٹ لکھنگ اُٹ۔
ہئو راست!
کنا عٹکل نا اسہ بشخ اندا خُلیس ئٹی ءِ کہ کس کنا فون ئے پُھلو۔۔۔
دا وڑ کنتو مُست ہم مسنے۔
رکشہ دائسکان سُرتنے۔
دا شار ئنا شور، دھنز و جنوری نا بھلا تہو کنا بامُس ئٹ پُترینگ ءِ۔
و دا غُٹ آن بیدس۔۔۔
دا غُٹ ئنا نیام ئٹی۔۔۔
ای فیصلہ کرینُٹ کہ نیکن گڑاس لکھیو۔

شارُل جان،
نے سما ءِ، کہ ہمو عکس۔۔۔ کنے کھسفک۔
ہراتم ای اودے چاگڑداری حوالکاری تلہ غا خنیوہ، ای مون ئے ہڑسینگ نا کوشست کیوہ۔
ولے دا منکن اف، اندن اف ؟
نی تینا چُنا ئے گُڈیکو وار بھاکُر کرینُس۔
اسہ اندنو بھاکُر ئس ہراڑے اندن گمان مریک کہ نی اسُل ہِننگ خواہپیسہ،
ولے سما اف امر، نی چاسہ کہ نے ہنوئی ارے۔۔۔
انتئے کہ نے اسہ ڈیہہ ئس ارے ہراڑکن جنگ کروئی ءِ، اسہ بروکوتم ئس ہرادے تراشوئی ءِ،
اسہ آجوئی ئس ہرا نا تُغ ئے نن کُل خنِنہ۔
پین اخس نسل ئے اونا بننگ آن مُست ہنوئی ءِ؟
کنے سما اف، شاری، ولے دا بھاکُر نا دڑد۔۔۔
سگ آن پیشن ءِ۔
امر اسہ لمّہ ئس دُن النگ ہِننگ کیک؟
گُڈیکو وار تینا چُنا ئے بھاکُر کننگ، دا چائند تون اوار کہ او تینا چُنا ئے دوارہ خنوف۔
دا اندنو دڑد ئس ءِ ہرا ایسر مفک۔۔۔ دا ارواہ نا بشخ ئس جوڑ مریک،
دا بے رحم آ جنگ ئنا پُچ ئٹ کھڈوک ءِ،
زیبل آ شارُلی۔
جنوری نا ہمو سی و یک تاریخ آن گُڈ ای نیکن ہچ لکھتوٹ۔
ای خود غرض اُٹ، بھازی آن۔
ولے دا نیامٹ بھاز گِڑا مس۔۔۔
نی کنا اُستا بسوسہ ولے کنا مِلی انداخس بند اس کہ ای ہچ لکھنگ کتوٹ۔
کیہی بندغ آک کھسفنگار۔۔۔
دشمن داسا دوارہ ٹِک کرسا خلنگ (ٹارگٹ کلنگ) ئے بناء کرینے۔
مننگ کیک ہندا گِڑا کنے اسہ وڑ بے سار کننگ کن بس اس۔
اپریل 2025 ئنا چھار تاریخ ءِ و وخت نیرموچ نا 12:51 ءِ۔
کنا اُست خواہنگ ءِ کہ نے کن دوارہ گڑاس لکھیو۔
آخر دا اپریل نا تُو ءِ۔۔۔
ہمو تُو ہراٹی نا ہنینا گند ءِ،
ہمو دتر نا ہنینا گند ہرادے نی الاس ہناس۔
سہی۔۔۔ دا بھاز کبینو ہیت ئس ءِ، ہئو نہ؟
ولے نے سما ءِ۔۔۔ “دتر نا ہنینا گند” بیرہ اسہ شاعرانہ جملہ ئس اف۔
دا بیرہ اسہ جملہ ئس اف ہرادے ای تینا ہیت ئے وزن دار کننگ کن پاننگ اُٹ،
آخہ۔۔۔ دا اسہ ہنینو گند ئس ارے، گواچنو و نِجاؤ۔
اسہ ہنینو گند ئس ہرا ہُرے اسکان سلیک۔
و داسا، ای اسہ آڑسندہ ئس کشنگ اُٹ،
اسہ کُڑمبو دم ئس ہلِسہ،
مونغی نا رہا سلوک،
توبے کنا کاٹم نا اسُل زیہاٹے۔
پھدینو چِھرک ئس کشنگ ءِ۔
ولے ای دادے رومانٹسائز کروفٹ۔
بیرہ زیبائی نا سوب آن دا پاروفٹ کہ قدرت زیبا ءِ۔
زرہ ئس مُر، منَہ پِشی نا “میئاؤ” نا توار ءِ۔
اندن کہ اسٹ ایلو تون بحث کننگ ءُ۔
و ہراتم پِشیک چُپ مریرہ تو کُچک آک غکنگ بناء کیرہ۔
خُڑک آخہ بلکہ مچٹ مُر جاگہ ئس۔
وا ہم اوفتا توار ہر کنڈ آ تالان مریک۔
و ای دائسکان دم کشنگ اُٹ۔
دائسکان ساہ ہلنگ اُٹ۔
بھازی آن پِشیک داسا ہنانو،
مُر آن بروکا غکنگ نا توار تیان خُلیسا۔
ولے ہمر کہ مرے۔
بے دُوی آ ساہدار تا توار ئے دیر پُہہ مننگ کیک؟
نی سوچنگ ئٹی مروس۔۔۔
دا لِکھ کار اخس آمخ ئس ءِ،
کنے انت تینا مونو ہیت پاننگ ءِ۔
ولے باور کیس،
دافتا توار و پھنکہ نا شور ہرا بجلی نا کم ئہ ود مننگ تون اوار کم ئہ ود مریک۔۔۔
نن نیمہ نا دا تیبہ سرود گاہ
دا بیرہ یاداشت ئے تیز کیک
پین ہچو خیال ئس کنے بفک۔۔۔ بیرہ نی
ای نیکن انت لکھیوہ
ای تپرہ۔
امر ایسر کیو ؟
ہچ سما اف۔
انت پاو
دا ہم کنے سما اف
ولے ای داخس چاوہ کہ:
بلوچ نا مسخت کن تروکا ہر اسہ قربانی مقدس ءِ۔
وا ہم۔۔۔
نی۔
نی کنتو اندن اوار اُس ہرا کنے ساندہ شرمندہ کیک۔
ہر اسہ دم ئے کہ ای ہلیوہ،
کنا دا رہ اے رہ ئٹ زند ئنا ہر اسہ ندارہ،
کنے نا یات ئے ایتک۔۔۔
انت سوب ئس ءِ دا نا۔
مننگ کیک دا نا زالبول مننگ نا سوب آن ءِ۔
مننگ کیک کہ نی اولیکو زالبول اسوس اندا سوب آن۔
مننگ کیک کہ نا اسہ اُرا گودی ئسے نا سوب آن۔
ولے کُل آن زیات۔۔۔
نا اِرا چُنا نا لمّہ مننگ نا سوب آن۔۔۔
و ولدا اوفتِہ النگ۔۔۔
دا خیال کنے اسُل الیپک۔
اسہ لمّہ ئس۔۔ اسہ مسخت ئسے کن۔
کنے سما اف داسا نا چُناک امر ءُ۔
ای چاننگ خواہپرہ ہم۔
دا خیال کنے پرغک۔۔۔
یا ہر ہمو بندغ دا خیال آن پنو ہراٹی زرہ ئس ہم بندغی مس۔
ولے ای داڑے نا قربانی ئے تول کننگ افٹ۔
نہ نا، نئے پین کس ئنا۔
وا ہم۔۔۔
نی کنا خیال ئٹ سلوک اُس۔
نی کنے فریشان کیسہ، شارُل۔
نی کنے شرمندہ کیسہ۔
داسا نن ئنا یک و نیم ءِ۔
ای بس انداڑے بس کیوہ۔
کُچک آک دائسکان غکنگ ءُ۔