راستی نا خون – ٹی بی پی سرگپ
بلوچستان جہان نا ہمو ڈیہہ تیٹ اوار ءِ ہراڑے جہانی صحافی تا بننگ آ بیدس پڑو رکھ خلوک ءِ، و اگہ ہندی صحافیک ریاستی بیانیہ تالان کننگ آن نمن مریر گڑا اوفتے زوراکی ئٹ بیگواہ و بیدس عدالت خون کون آ ترند نتیجہ تیتون مون تروئی تمک۔ ریاستی تادی نا راستی ءِ جہان اسکان سر کننگ نا سوب آن دا وخت اسکان بلوچستان ئٹ چِل و دو صحافی کسفنگانو۔
ایمنسٹی انٹرنیشنل بلوچستان ءِ ”صحافی تا قبرستان“ گوندانے، اندن 2014 ئٹ رپورٹرز وِدآؤٹ بارڈرز (RSF) قلات ڈویژن نا بھلا ہند خضدار ءِ جہان نا ہمو دہ شار تیٹ اوار کرے ہراڑے صحافت کل آتیان بھیم بش کروک پیشہ اس جوڑ مسنے۔ پاکستان جمعی وڑئٹ صحافی تیکن اسہ بھیم بش کروک ڈیہہ اس الم ارے، ولے بلوچستان اوفتیکن بھلو وخت ئسے آن مرگ ئنا میدان جوڑ مسنے۔ داڑے ریاستی ظلم آتے پاش کننگ ہر وخت صحافی تا ساہ ئنا دژمن جوڑ مریک۔
پاکستان نا بنجاہی صحافتی ادارہ ریاستی زور شاغنگ نا سوب آن بلوچستان نا جنگ زدہ ڈیہہ، بندغی حق آتا لتاڑ، و زوراکی نا بیگواہی کون آ سرحال آتے کوریج تفک۔ بلوچستان نا بابت اسہ کنڈ ئنا و جشوک آ بیانیہ جہان نا مونا ہتنگک تاکہ ریاستی ادارہ غاک بلوچ راجی تحریک ءِ پیشن نا چم ئسے نا نتیجہ پاریسہ اونا سیاسی حیثیت ءِ نسخان تننگ کیر۔
بلوچستان ئٹ آجوئی نا جنگ اِرا دہائی آن زیات وخت آن برجاء ءِ۔ برجاء سال تیٹ بلوچ مزاحمت کار تا کاروائی تیٹ ہرا ترندی و حکمت عملی اوار مسنے، ہمونا ردعمل ٹی ریاست ہم انسداد نا پالیسی تے گیشتر ترند کرینے۔ ہرافتا سوب آن بلوچستان نا کیہی ضلع تیٹ مخلوق پاش ریاستی تادی نا شیف آ زند گدریفنگ آ بیوس ءِ۔ دن انگا وخت آ صحافت نا اولیکو ذمہ واری اندا مروئی ءِ کہ اوفک دا ظلم آتے پاش کیر، ولے بد بختی آن پاکستان نا میڈیا ادارہ غاک راستکی نا جاگہ غا ریاستی بیانیہ ءِ تالان کریسہ تینٹ ہم ظلم ئنا بشخ جوڑ مسنو۔