مرغن ءُ پند اس آجوئی کن
خود نوشت نیلسن منڈیلا
جاچ: جعفر قمبرانی
(مسٹمیکو بشخ)
نیلسن کن افریکن نیشنل کانگریس اٹی بننگ اسہ بھلو وبال اس جوڑ مس۔
نیلسن نا زند داسا گہس تُو تا تُو زندان تا گواچی ئسک و وختس نیلسن آ سفری پابندی لگاکہ کہ او بیرہ اسہ چنکو شار اسے آن بیدس دانگ اینگ سرنگ کپ۔ اونا سوب دا ئسک کہ نیلسن تینا قوم انا بزگی ءِ خُڑکی آن احساس کریسس و ہر جاگہ ہناکہ سامراج نا برخلاف تینا خاچوک آ مخلوق ءِ بش کریکہ۔ اودے تینا اُرا نا گڑتی ئسک و نئے تینا لمہ ایڑ دائے تا۔ اونا مزل اسٹ ئسک۔۔۔۔۔ آجوئی
نوشت کیک کہ نن کمپین چلیفین، دانگ اینگ رُمب کرین و ہراڑے موقع دو بسکہ ای گُڑا تینا لوز آتیٹ تینا جند انا لمئی بولی ٹی تینا مخلوق ءِ گچین وڑٹ پہہ کریٹہ کہ نن تون ظلم و زوراکی مریک ننے چھپ تولوئی اف۔
نوشت کیک کہ ای تینا اسہ دا کاریم آن است جم ئسوٹ کہ کنا جوانو کاریم اسے و ایلو ای دا سوب آن ہم گلان بال ئسوٹ کہ ای ہندنو شعبہ اسیٹی ہناسٹ کہ ای تینا مخلوق نا کمک کننگ نا وخت ہچو پابندی یا بھیم اسے نا گواچی متؤٹہ۔
یانی کہ نیلسن وکیل اس جوڑ مس و تینا مخلوق نا حق اٹی ہیت کننگ کن مستی مننگ کریکہ۔
نوشت کیک کہ تینا جہد کاری نا دے تیٹی ای اسہ وار ولدا اسہ مسڑ اسیتون توسٹ ہراکہ کنے دوست بسک۔ مسڑ ہمت و حوصلہ نا اسہ بھلو چیدہ اس ئسک گڑا ای اودے برام کننگ نا است خواہی ءِ پاریٹ۔ واہم ای اودے پاریٹ کہ ای اسہ جہد کار اسے اُٹ و کنا زند اُرا غان زیات پیشن نا جہان ٹی تدینگو گڑا نی سختی سوری تیتون کنے قبول کیسا تو برام کینہ۔
لکھک کہ ہمو مسڑ ہرانا پن وِنی (Winnie) ئسک کنا ہیت آتے بھلا است اٹ امنا کریسا کنا ارٹمیکو زائیفہ جوڑ مس۔
نوشت کیک کہ: ”اسہ جہد کار اسے نا زائیفہ جاہیکہ اسہ جنوزان اسے آنبار ءِ، اونا اَرغ زندان اٹ مرے یا مف“
نیلسن جہس نوشت کیک کہ کنے کل آن زیات ہمو وخت خوشی مس کہ ای برام کریٹ کنا زائیفہ ہم ہمو کل زالبول تیتو اوِڑدہ مس ہرا نن تون اوار کسر تیا بسرہ و ظلم انا مون آ سلیسرہ۔ لکھک کہ کنا زائیفہ ہم اسہ کمپین اسیٹی زالبول تیتو اوار منا وخت زاندان تا گواچی مس ہرافتا ای کیس ءِ عدالت اٹی دریٹ و دا کل زالبول تے آجو کرفیٹ۔ ولے کنا زائیفہ زندان اٹی کنے کل آن بھاز دوست بسکہ نا کہ اُرا ٹی۔
زالبول تا باروٹ نوشت کیک کہ چیف لیتھولی ننا پارٹی نا کماش پاریکہ کہ “ہراتم زالبول آک داوڑ جہد اٹی بشخ ہلکر گڑا ننے تینا زند اٹی آجوئی ءِ دوئی کننگ آن ہچو طاغت اس تورنگ کپرو”
یخینن ہندن مس۔
ولے آجوئی آن مالؤ نیلسن منڈیلا و اونا سنگت آتے سوگؤ مننگ کن بھلو پند خواری اس کرفنگ قدرت نا پارہ غان طے ئسک۔ ہندا سوب آن نیلسن نا مزغ اٹ دا ہیت بسک کہ سیاست و سیاسی جہد تینا جاگہ ولے بیدس جلہوکاری، مزاحمت و تیر و توفک آن آجو مننگ اڑزان مفرو۔
گڑا نیلسن تینا خڑک انا سنگت آتے سلہہ بند جہد نا پارہ غا سَلا تننگ بنا کرے۔ سنگت آک پاریر اگہ ننا پارٹی (ANC) دا ہیت آ امنا کیک تو ننے ہچو اعتراض مفرو۔ ولے تنظیم نا فیصلہ کروک و کماش آک دا ہیت آن نمن مسر اسیکہ، اوفک پاریر کہ اخا نن پرامن وڑٹ آجوئی کن تینا گڈیکو ساہ تے اسکان کوشست کرون۔
ولے نیلسن نا است سلتؤ۔ او اسہ وار پدی سلہہ بند جہد نا ہیت گپ آتے پارٹی نا مون آ اتیسہ کرے۔ مسٹمیکو وار نیلسن تینا منا سنگت نا کمک اٹ کل انا اؤ ءِ ہلنگ اٹ سرسہب مس کہ اؤ دا کاریم کامریڈ نیلسن نا کماشی ٹی اسہ جتاؤ پن اسیٹ مننگ کیک۔ ولے ‘اے این سی’ ہم تینا کاریم ءِ مست انا وڑ برجا تخو۔
داسا نیلسن پارٹی نا اسہ ایہن ءُ باسک اسے آن اسہ آزاتی دوست جنگوڑہ سے نا وڑٹ ہم چاہنگ مسکہ۔ گڑا نیلسن کن اُرا ٹی زُنڈنگ جوان الؤ۔ نیلسن تینا اراٹی زائیفہ غان تینا رخصت کریسا پارے ای کاوہ۔۔۔
سما اف ہرانگ و اٹ وخت کن۔ بس ای کاوہ نم تینا خیالداری کیرے۔ اونا زائیفہ جہس نوکری کریکہ و تینا و چنا تا پڈ ءِ ولیفیکا۔ نیلسن ءِ سما ئسک کہ اونا اُرائی و چنا تا سخت انگا دیک بنا کریر۔ نیلسن مونجا، خوش، تام و بے تام انگا احساس آتیتون ارا غان پیش تما۔
کیہی تُوک لگار کہ نیلسن تینا ملک اٹی پِشی و ہفت خانئی جوڑ مس۔ اسہ جہس دنو الؤ کہ اوڑے او اِرا دے آن بڑزا رہینگوس۔ ارف بِٹ، نرنگ تمنگ، مخنگ اوغنگ، شوگیری و بے تغی نیلسن نا زند انا سنگت جوڑ مسر۔ تہار اونا زند ءِ تہار آ نن آنبار پلویڑ کریسس۔ اودے سما الؤ کہ ہراتم دا نن سہب مرو یا پین ہم مرغن ءُ تہاری مرو۔ نیلسن تینا جوزہ تیتون اوار گام کریسا ئس۔
ایسر نیلسن تینا سنگت آتیتون سَلا کریسا اسہ فیصلہ اسے آ سر مس کہ او ہمو ملک و پیشن نا دیہاڑ آتے پٹ پول کیک ہرافتا جوان ءُ است بڈی و دلچسپی اس اوفتا ملک اٹی ارے۔ او سوچا کہ ہرا ملک آتا نن تون است بڈی ارے گڑا نن ہموفتا جند انا است بڈی تے پورو کریسا اوفتے تینا فائدہ کن، و تینا ڈے انا آجوئی کن تینا کمکار جوڑ کینہ۔ باور کیس دا گڑا نیلسن ءِ ڈغار آن آسمانی اس جوڑ کرے۔ نیلسن ہژدہ تو اکن نریسا ہنا پیشن نا ملک آ۔ انتئے کہ نیلسن تینا جند انا ملک اٹی ہم بدر تیان بار پیری کریکہ و داڑے اوڑے ڈکوک ئسک۔ ہندا سوب آن پیشن نا ملک آ ہننگ کن ہم او اسہ جعلی ءُ پاسپورٹ اس جوڑ کریفے ہراٹی فوٹو تو اونا جند انا ئسک ولے پن تے جتا ئس۔ ہندا جعلی آ پاسپورٹ نا زی آ نیلسن کیہی ملک آتے چکر خلیسا تینکن فنڈ انا خواست کرے۔ دا ملک آتیٹی تنزانیہ، ایتھوپیا لندن مصر دِلی و سنیگال ساڑی ئسر۔ پین تیان مس متؤ ولے دِلی (Dilli) نا ملک آن نیلسن ءِ چنتہ اس شپ پیسہ نا رسینگا کہ او تینا جہد ءِ برجا تخنگ کیر۔
نیلسن ءِ سما ئس کہ اونا ملک انا پولیس اودے خاخو آنبار پٹنگ اٹی ءُ ولے دن سما الؤ کہ اونا دسگیر کننگ کن بھلو چمبازی ہم کننگاسس۔ ہندا سوب آن نیلسن ہراتم تینا ملک اٹی گام تخا گڑا اودے منا دے ٹی پٹیسا دسگیر کننگا وا اونا زی آ اِرا کیس خلنگا۔
اولیکو کیس دا کہ جعلی پاسپورٹ آ پیشن نرانے
ایلو دا کہ بمب و تراک آک نیلسن نا کماشی ٹی کننگانو ہرافتیٹی بھلو کچ اسیٹی حکومتی مڈی تے نسخان مسس۔
یات سلے کہ نیلسن ہراتم توفکی جہد نا بنا کرے تو اونا کلان بھلا شکار حکومت نا ہمو جاگہ و مڈیک ئسر ہرافتیان حکومتی کارندہ غاک فائدہ ہلنگ ئسر۔ واہم نیلسن عام اولسی جاگہ تیا بمب تراک و جلہو آن پِزیر کریکہ کہ نوائے کنا تینا مخلوق نا دتر وہو۔
داوڑ نیلسن زندان اٹی ئسک و اونا کیس آک عدالت ٹی برجا ئسر۔ مخلوق مچ مسکہ کہ نیلسن و اونا سنگت آتون انت مرو ولے مسہ چار وار چمبازی اٹ بیدس فیصلہ غان مخلوق ءِ ہندن پدی رائی کننگاکہ۔
ایسر نیلسن گڈیکو پیشی آ بھلو تقریر اس تیار کریسا عدالت اٹی ہنا۔ عدالت ہراتم اوڑان سوج کرے کہ نی تینا سفائی یا تینا حق اٹی انت گڑاس پاننگ خواسہ۔ نیلسن بنا کرے وا اسہ وار تون کیہی گھنٹہ تران کریسا عدالت اٹی غٹ مخلوق ءِ فریشان کرے۔ اودے سجاسس کہ حکومت اودے یلہ کپک گڑا انتئے او تینا مخلوق ءِ تینا فکر آن واخب کپ۔
نیلسن ہرا ہیت آتے عدالت اٹی کرے اوفتیان چندی دا وڑ ئسر: “کنا بزگ انگا قوم، ای زندان و عدالت اٹی بیرہ دا سوب آن تینا ارائی آ پچ آتیتون بسونٹ کہ زندان نا بیرشت آک کنے غلامی نا احساس کرفرہ و کنے تینا جند انا پچ آک تینا قوم انا شرف و آجو مننگ نا گواہی ترفرہ۔
کنا مزغ غلامی ءِ امنا کپک۔
ای تینا اُرا، زائیفہ چنا و پین کیہی آسراتی تے تینا قوم انا بزگی کن ندر کرینٹ۔
ہندن اگہ کنے دا بےانصاف آ عدالت آن سزا نا حکم تننگ مرو ہم دا کنکے فریشانی نا ہیت اس مفرو انتئے کہ کنے تینا دژمن آن ہندا امیت ءِ۔”
ایسر او دا کلہو تریسا چھپ کیک کہ سوگؤ مبو و تینا سامراج ءِ درست کبو تانکہ اونا برخلاف بش مبو۔
داوڑٹ عدالت نیلسن ءِ جعلی پاسپورٹ کن پنچ سال و بمب تراک آتیکن تیبہ عُمر سزا ایتک۔
دا ڈول اٹ تیبہ عمر نا سزا نیلسن کن بیست و ہفت سال نا زندان جوڑ مریرہ۔ نیلسن ءِ اوفتا ملک انا کل آن تنیا، تہار و ڈکھیائی آ زندان اٹی بند کیرہ ہراکہ دریاب نا نیام اٹی اسہ جزیرہ ‘روبن جزیرہ’ ٹی ئسک۔
نیلسن نا زند اٹی مؤن آ جمر آک تفیر۔ اونا زند اٹی تہاری پین ودا و بھیمسرکی پین تالان مس۔
بروک آ بشخ اٹی نیلسن نا زندان نا کسہ غاتے نوشتہ کریسا مون مستی ہنوٹ۔
(برجا ءِ)
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک