ضلع کیچ نا بنجائی شار تربت نا علاقہ کوشک و ملک آباد ٹی پاکستانی لشکر نا اُرا تیا چھاپہ، بیدادی و درزن آ بندغ آک زوراکی ئٹ بیگواہ کننگار۔
ہندی بندغ آتا پاننگ ءِ کہ ننکان پاکستانی لشکر علاقہ ءِ پلویڑ کریسہ لشکر کشی کرے ہرانا سوب آن کیہی بندغ آتے دزگیر کریسہ تینتون دریر۔
اوفتا ردئٹ تربت نا خڑک ئنا علاقہ ملک آباد و کوشک ئٹ فورسز آک استو لشکر کشی کریر۔ دا وخت آ فورسز آک عبدالمجید نا مار عبدالرحمن، امام بخش نا مار حمل امام، مراد حاصل نا مار ظہور احمد، مراد حاصل نا مار خلیل احمد، ظہور احمد نا مار اخلاق، پیر محمد نا مار طیب، غلام محمد نا مار ملنگ، نسیم احمد نا مار نصیب، غلام محمد نا مار علی احمد، محمد نا مار محبوب، محمد نا مار حامد، علی احمد نا مار فدا، علی احمد نا مار عمیر، الطاف نا مار شاہ سلیم، عبدالواحد نا مار حفیظ و عبدالواحد نا مار ادیب ءِ دزگیر کریسہ بیگواہ کریر۔
دائسکان ایلو زوراکی ئٹ بیگواہ بندغ تا چاہنداری مننگ کتنے۔ ہندی بندغ آتا ردئٹ فورسز آک اُرا تیا چھاپہ نا وخت آ چُنا نیاڑی تے ہم بیدادی نا گواچی کریر۔