بلوچ نیشنل موومنٹ (بی این ایم) نا بندغی حق آتا ادارہ تینا مئی 2025 ئنا رپورٹ ءِ شنگ کرینے، ہراٹی بلوچستان ئٹی بندغی حق آتا حالیت ءِ درشان کننگانے۔ دا رپورٹ ئٹی بلوچستان ئٹی کیہی دہک آن برجاء بندغی حق آتا لتاڑ ئٹ فریشان کروک کچ اسکان گیشتری ءِ درشان کننگانے۔
پانک رپورٹ ئٹ پارے کہ ننے رسینگوک کچ و حساب نا رد ئٹ بلوچستان ئٹی مئی 2025 ئٹی پاکستانی فوج 128 بندغ ءِ زوراکی ئٹ بیگواہ کرینے، ہندن 27 بندغ ءِ بیدس عدالت کھسفنگانے، زوراکی ئٹ بیگواہی نا گیشتر کیس آک ضلع گوادر ئٹی رپورٹ مسنو ہراڑے 32 بندغ ءِ زوراکی ئٹ بیگواہ کننگانے۔ داڑان پد کیچ ئٹی 27، کراچی ٹی 10، آواران ئٹی 9، شال ئٹی 8، پنجگور و مستونگ ئٹی 7، چاغی ٹی 5، ڈیرہ بگٹی ٹی 4، نوشکی ٹی 6، موسی خیل، قلات و خضدار ئٹی 3، ہندن بارکھان ہرنائی ٹی 2، و واشک ئٹی 1 بیگواہی ئسے نا کیس رپورٹ مسنے۔
رپورٹ ئٹ ودیک پاننگا کہ بیدس عدالت بندغ آتے کھسفنگ نا حوالہ ئٹ مئی نا تو بھاز خراب گدرینگانے، 27 بندغ ءِ پاکستانی لشکر، اوڑتو تفوک ادارہ آک و ریاست نا ولفوک آ ڈیتھ اسکواڈ آک کھسفینو۔ 1 مئی آ پنجگور نا علاقہ تسپ ئٹی سمیر احمد ءِ دزگیر کننگ آن پد زوراکی ئٹ بیگواہ کننگا و 9 مئی آ اونا جون خننگا۔ 5 مئی آ 15 سالی آ علی بلوچ ءِ ریاست نا مخ تفی ٹی کاریم کروک ڈیتھ اسکواڈ آک کیچ ئٹی کھسفیر۔
10 مئی ئٹ وحید بلوچ ءِ پنجگور آن بیگواہ کننگا و گڈیکو دے اونا سم تیٹ خُلّوک جون خننگا۔
صوفی طارق ءِ گوادر نا دیہات جیمڑی آن زوراکی ئٹ بیگواہ کننگ آن گڈ کھسفنگا۔ ہندن فہد لہڑی نا جشوک جون 13 مئی آ شال آن خننگا۔ 2014 ٹی بیگواہ کننگوک محمد رمضان نا جوْن ہم خننگا۔ یونس بلوچ ءِ آواران نا ہند مالا ئٹی کھسفنگا۔ بختیار بلوچ ءِ ہموتم قلات ئٹی کھسفنگا ہراتم او فوجی کاروائی تا برخلاف توار ہرفنگ ئٹی اسک۔
ساجد بلوچ، یاسر بلوچ، حنیف عزیز، عبدالطیف، و غوث بخش نا وڑ انگا بندغ آتے اُرا تے آن بیگواہ کرسا کھسفنگا۔ عبدالطیف بلوچ ہرا سینئر و صحافی ئس اسک، اودے اونا اُرا ٹی تُغ ئٹی سم کاری کرسا کھسفنگا۔ ہراڑان بلوچستان ئٹی میڈیا ءِ مون ہلوک خطرہ غاتا پکّو ثبوت رسینگا۔ مئی ٹی 3 بندغ عبدالرحمن بزدار، فرید بزدار و سلطان مری ءِ پولیس نا ادارہ سی ٹی ڈی بیگواہ کرے و منہ دے آن پد دروغ نا مونتس ئٹی بارکھان ٹی کھسفے۔
26 و 27 مئی آ آوارن نا علاقہ مچی مالار ئٹی فوجی کاروائی نا وخت آ لس شاری نعیم بلوچ و ھوری بلوچ ءِ کھسفنگا، و اسہ نیاڑی ئس بھاز ٹپی مسک۔ 22 مئی آ شیرخان کھیتران ءِ بارکھان آن دزگیر کننگا و اونا جون 28 مئی آ خننگا۔ درمان بلوچ ءِ ارا وار دزگیر کننگا و آخر کار اونا جون 30 جون آ جھاؤ آن خننگا۔ آپسر تربت ضلع کیچ ئٹی 29 مئی آ ڈرائیور مسافر بلوچ ءِ کھسفنگا۔ ہندن ہمو دے اکن نذر بلوچ، عبدالعزیز و ایلو دے 30 مئی آ لیویز کارندہ صغیر احمد ءِ ہم کھسفنگا۔
پانک ئنا رپورٹ ئٹی پاننگانے کہ دا کھل تدینی تیان دا پاش مریک کہ بلوچستان ئٹی ریاستی ادارہ و اوفتا مخ تفی ٹی کاریم کروک ڈیتھ اسکواڈ بے مہار مرسا لس شاری، طالب علم، صحافی و سرکاری کارندہ غاتے ٹک کننگ ئٹی ءُ۔ دا تدینیک نہ بیرہ قانودی اصول آتا لتاڑ آکو بلکہ اشتماعی سزا، خُلیس تالان کننگ و زوراکی ئٹ بندغ آتے بے توار کننگ نا بشخ ءُ۔ جہانی برادری آن خواست کننگک کہ او دا سوگو و خطرناک آ بندغی حق آتا لتاڑ نا زوت نوٹس ءِ ہلیر و بلوچستان نا بیوس آ مخلوق ءِ انصاف ترسہ تینا کڑدار ءِ ایسری ایتر۔