بھیم تالان مس! (افسانہ)
نوشت: جعفر قمبرانی
دی بلوچستان پوسٹ
کلاس نا تہٹی بھلو شور شر اس ئسک۔ استاد نا مزغ ءِ چناک بھاز انگا ہیت گپ آتون تینا کنگوسر۔ کسس سوج کریکہ تو گیشتر تا تین پہ تین تران کریرہ مخارہ۔ اسٹ سٹی بش مریسا دیوال نا دلبند آ لِچنگوک پیہن آ بورڈ آ لیک کشنگ بنا کرے۔ کسس تینا ہور تے چکیسہ ترکّہ کشیسا کریکہ۔ چندیک ہندن ئسر کہ اڑنگ بڑنگ و پین گوازی کننگ اٹی مشخول مسوسر۔
استاد توار خلیسا پارے چھپ کبو۔ کلاس نا اصول آتا خیال ءِ کبو، یا کنا استادی نا لحاظ ءِ کبو۔ تینا با تے بند کبو!
ولے کسس اونا ہیت آ غور کتو۔ اسل بنتور ہچ۔
استاد کُوک خلیسا کرے تانکسکان او گُٹ گلو آن ہنا چٹ۔۔۔
استاد فریشان مس کہ داسا دا کل ءِ امر چھپ کرفو ہرافتا شور اٹی تو کنا توار اسہ چنا اسکان ہم سر مننگ افک۔ استاد نا پیشانی آ خید آک یلہ مسر۔ اودے تینا ردی نا احساس مس کہ اگہ ای اسہ جوان و گچین ءُ استاد اس مسوٹہ گڑا کنا موضوع تیان کنے سوگوی مسکہ و چنا تے جوان سرپد کرفنگ کریٹا تو او داسا شور کتورہ بلکن کنے آن گڑاس ہیل کننگ کن چھپی اٹ خف توریرہ۔
استاد چاہس کہ ای چنا تے اسہ استاد اسے نا وڑ اوفتا حق ءِ تننگ کتوٹ کہ اینو او ہم کنے نمن کریسا تینا منشا ٹی شور کیرہ و تیوہ غا ادارہ ٹی اسہ کوکار اس ٹہیفینو۔
استاد چیہانٹ کریسا چھپی نا سبخ تننگ بنا کرے ولے چناک چھپی نا پِن ءِ تتورہ۔
اسل عجیب ءُ حالیت اس ودی مسس کہ استاد خجالت محسوس کننگ ئسک کہ کنا ساڑی گری ٹی دا شوم آک امر شور کننگ ءُ یا امرو گڑا سوج کننگ ءُ کہ دافتا بھلو کچ اس تو کنا جند ءِ ہم سما افس۔ استاد نا کوچرائی ہم مننگ ئس و شور آن مزغ تا پدّام ہلکوسس۔
ناگمان استاد نا دروشم خوشی آن چٹ ہلک۔ اونا مزغ اٹ گڑاس بس یا اودے چم اس سُجا۔
کہ او تینا کڑسی آن بش مریسا دانگ اینگ ہریسا ہچ خنتو تو تینا چؤٹ ءِ کشا و دوٹی ارفیسا مون آن تولوک کل آن چھپ انگا چنا غا جلہو کرے ہراکہ سوج کریسس کہ؛ ”استاد کنا خواجہ! نما کلاس ٹی چناک انتئے چھپی ءِ تپسا؟“ است ہندا موٹو آ وار خنا، نئے اسٹ و نئے اِرٹ۔۔۔ماشٹر تینا بُرّی آ چؤٹ اٹ دا مارکو ءِ پبّی خلک۔
استاد چنا ءِ جوان ءُ منٹ خلیسا پارے، ”چھپ کبو۔“
دے اس خنا کہ منا ساعت اٹی تیوہ غا کلاس نا دوویک بند مسر۔ اسہ چنا نا چپلہ کاری آن تیوہ غا کلاس نا چنا تیٹی خلیس اس تماسس۔۔۔
استاد بروت آتیا دو تخسا پارے ’نما علاج ہندادے۔۔۔داسا ہُرو دیر ہیت کیک۔‘
کسس ہچبر کُچنگ الؤ۔
استاد نا مون چٹ ہلک و اونا تیدار نا کرنچ آک اودیم مسر۔
بھیم تالان مسس۔ استاد خوش مس و چنا تا لخک لُڑار!
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک