اُسامہ و احکام جگری یار
نوشت: دلوش بلوچ
دی بلوچستان پوسٹ
انت انت نوشتہ کروٹک نمکن نما کرد ئنا کچ کنتو لوز اف بلکہ کنتو انت کل جہان ئٹ دُنو لوز اف کہ نما کردار ءِ نوشتہ کیرک ای لوز آتا دُوتفو نمکن کتاب نوشتہ کیو یا کہ ناول نوشتہ کیو یاکہ غزل نظم نوشتہ کیو یا افسانہ نوشتہ کیو کنا پنوک ءُ لوز آک ٹُکر ءُ، علم آن ای خالی اُٹ بس کہوکا لوز آک اندا دُو کنے بشخرے کنا سنگتاک نما کردے عرش ئٹ ای نما نت تا مِش تیکن ندر مریو ہم کم ءِ، نما کرد آ جہان نا کل ادیب و دانشور آک افسانہ نگار آک بریرک نوشتہ کیر اوتا قلم تا سیاہیک کُٹر نما کرد ئنا لوز اس پورا مف، جہان نا سیاہیک کُٹر یا نوشتہ کار آتا لوز آک ہم کُٹر نما کرد ئنا لوز اس ہم نوشت کننگ کپس یا پورا مفس۔
نما ہیت و گپ آتا ہتم تا موسمک بریر بننگ کن یا نما بشخندہ غاتیا ہورہ و چیلکی گروک آک بلوچی چاپ کیر، یا کہ ڈیہہ ئنا گواڑخ آک نمے آ گلاب چٹ ایتر، جنّت نا حور آک نمے آ پھل شنکی کیرک، فرشتہ غاتا نما محفل ٹے ٹاکو مرے اِستاک نما دُو تے انام کیرک، نما برام حانُل وطن تو مسک درخت آک بوچ آک شعر پارور ناز ئٹی نمکن، لیکو خلیرک ککو آک کنا نم جغک اُست ئنا بنداک، خنتا چراغ آک، جنّت نا گلاب آک، طوبے تا ہمراک، اِستار تا سنگت آک، مَش تا گواڑخ آک نازرکا سحر تا بُلبل آک، آجوئی نا سُہب ئٹ بشخندہ غاتا ندارہ غاک۔
یار احکام خنتا نور ئس لمہ نا لاڈلا غا شتکُلا چنکا مارو، اسلمی آ سپائی بُزگر و ناگاہو اِسپل نا زیب و زینت بولان نا اِرا آماچ ئنا فرزند، بُڑز آ چلتن نا شوخا ادا، شال ئنا روشنا دیدہ، ہر خنتا چیدہ زندہ اُس، سگ ئنا پن بادل پاریکہ ای ہمو جمر اُٹ ہرا تینا لمہ ڈغار آ دتر نا پِر کیکک گڑا ڈیہہ ئنا کنا ہر بوچ و نہال مہر ٹی رُدسا کائک آجوئی نا مزل ءِ برجا کریسا کائک، آجوئی نا سہب ءِ اَتیکک گُڑا کنا قبر آ بریکک، اُسامہ ای و احکام دو تے اِنام کرسہ شہادت ءِ نوش کینہ، اُسامہ ننا ہر اسہ پند و ڈکھ ڈیہہ ئنا چنا ایڑ ایلم لمہ باوہ تا آسراتی تیکن ءِ گُڑا نن پانہ ننا زند کائے ولے قوم ءِ اسہ جوانو سہب اس رسینگہ۔ سنگت نا مہر ئتو سنگت ءِ، بلبلوکا اِستار سنگت ءِ، خنتا روکا چراغ سنگت ءِ، آسمان تا زیب نازرکا نازبو بالاد ئتو شپارکا بُڑزا کرد ئٹ سلوک ءِ عرش آ وطن نے آ فخر ئٹی بریکک اِرا دو ئٹ سلام کیکک ہرا ہفت آ آسمانک خڑینک خلیرہ نیکن۔
یار سنگت نم شیموشی آ رفتار ئٹ ریل ءِ ہلکرے بادل پارے اُسامہ کان کربلا نا یزید آتے مشکاف ٹی خُوک کینک، سنگت پارے کان دا مسخت ننا کسکن داٹے شہید مسون ولدا زندہ اُن گِسِر کپہ بہ خلین دُژمن ءِ ندر مرینک وطن آ، اُسامہ احکام نما دترک رنگ اتورک کنے ہُج ءِ پین فدائی کوڑ مروئے، اُسامہ سنگتی نے آ ختم سنگتی ءِ۔ نے سد سلام ءِ بولان نے آ فخر ٹے، نم پاریرے ننا جَن جنازہ ءِ، دترک انامک ءُ، کفنک دستار آک ءُ، برام وطن تو مس، اُسامہ و احکام نما سنگتی نا ہچ مٹ اف، او ہراتم تینا ہوش ءِ سمبالانو جگری ءُ یار مسونو یا شار مرے یا بولان مرے داتا سنگتی اسہ وڑئٹ ئس، اسہ جاگہ غا فدائی کریرک، اسہ جاگہ ڈغار ئٹ جہی مسر، ہراتا سنگتی ءِ جہان نا کنڈ کنڈ ءِ چاڑ کر خمپیس ہراتا یاری ءِ دا جہان ئٹ خمپیس، ہرا ہُوش ءِ سمبالانو تینا زند ئنا مسخت ءِ پٹانو او مسخت قوم ئنا مسونے تینا بروکا نسل ئکن مسونے تینا سر ڈغار ئکن مسونے، گُڑا داتا سنگتی نا ہچ مثال اف، ولے خاص وڑئٹ جگری ءُ سنگت نے سرمچاری ٹے رسینگک داڑے عظیم ءُ سنگتی رسینگک نمے بیرہ داڑے ہمو سنگتی ایلمی و باوہی ءُ مہر رسینگک۔
ای تینا یارا تا نت تا مِش تیکن سدخہ مریو، دا چُنکی آن بھلن مسر اواری ٹے ولدا اواری ٹے زند ءِ تسر، تینا ڈغار کن اسہ وڑ ئٹ فدا مسر، گڈیکو سم تے پن آ کریر، گڑا ننکن دا پاننگ آسان ءِ ولے ہرا وخت نن دا فلسفہ ءِ خُڑکا خن ٹے ہُرن گڑا سرپند مرینہ تے دا نا سرپنداری سخت ارے ولے خوڑتی اٹ زوت پو مریرے تے، گُڑا دا ہیت دادے گڈیکو سم نا پن النگ آسان ءِ ولے ہرا وخت نی تُوفک ءِ کاٹم کن تخاسک گڑا ہمو وخت نا نُک اسل بارک خشک مریک، نا رغ رغ تا دتر بارک ولے دا فدائیک ءُ ہچ چُرت اف تا، گڈیکو سم ءِ تینا پن آ کیرہ، اندا سوب آن دا ہیت ءِ ہیسٹ کہ پوہ مبو دا فلسفہ ءِ نن نم پانہ بس فدائی مسونے داڑا غور و فکر کبو ہبو تے داتے لمہ باوہ ایڑ ایلم ئس اُرا ئس خواہش ئسک ولے داتے کل ءِ مُر کریر انتئے کہ قوم آن بیدس ہچ اف دا غلامی زار ئسے بیماری ئسے۔ گڑا کنا یار آک اُسامہ احکام نما توار بولان نا مَش مش ٹی تاقیامت زندہ مرو۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک