طوبے تون خمب الیرہ
آسمان آ سر مریرہ
جون آن خیسن ءُ، پھل آتے دیر تیرہ
یاراک سریلہ غا جائی کمال کیرہ
سارو نا درنگ آتو بزگر نا ٹل ءِ ہرِف
ورناتا سوگؤِنگا ہر مش ئنا تل ءِ ہرف
غفار یار سگار نا ہِن مُنگل ءِ ہرف
اوتا دلیری نا جوہان نا جہل ءِ ہرف
ناگاہو نا شمتیٹی لیکو ءِ مار ئسے نا
خزم آتِتون مشی آ دیوان ءِ یار ئسے نا
آجوئی ءِ نازیفک توار ءِ سرونزی تار ئسے نا
ککو ءُ داسہ سیسوک روان ءُ طرف آ شار ئسے نا
بولان ئنا بنج آتا نشان گام ئسے نا
رندٹ ہنانو یاراک لالی امام ئسے نا
زمزیرتے پرغرہ داسہ غلام ئسے نا
پِنا اوتا کرینن بنا ءِ کلام ئسے نا
فدائی ءُ منٹ ئس منٹ ئسے او شہیداک
ڈیہہ آ تینا فدا او وڑ وڑ ئٹ ہُر مریداک
مشکاف ءِ سوب بشخار بولان نا خنتا دیداک
ہچ سُرفتور کاٹم اوتا مونا پنجابی آ پلیداک
ہکل تو نرمزار آ ہیروف بش کیرہ
لامب ایترہ بدرتے تینا سمّٹ کہیرہ
ماہل نا وڑو فکراک تینٹ تینے ہُشیرہ
آجوئی نا چِرِک ئٹ گواڈخ نا وڑ رُدیرہ
چلتن نا چل ولی آ شاغانو شالی بیرک
توتکی آ پریک ام بینانو شالی بیرک
ٹپی آ دوتِتو مڷاک گؤفانو شالی بیرک
خن ٹپ آ میر و سڑدارک ام ہُشانو شالی بیرک
بے سوب آ یار جولان دیدارکن نما سِکِک
پنی آ نوشت آتے ریک آتیا او لِکِک
جولان بلوچ