نیشنل ڈیموکریٹک پارٹی نا بنجاہی سروک و اسکالر غنی بلوچ نا زوراکی ئٹ بیگواہی نا برخلاف برانز کننگا، برانزیک اونا رکھوک یلہ مننگ نا خواست ءِ کریر۔
خاہوت نا پاننگ ئس کہ اسہ تو ئسے آن زیات وخت گدرینگانے، ولے دائسکان اونا یلہ مننگ ممکن مس و نئے کہ ریاستی ادارہ غاتا پارہ غان است بڈی تروکو ورندی تننگا۔
اونا یلہ مفنگ نا برخلاف اینو خاہوت و ایلو شاریک “سرمل” نا ہند آ کوئٹہ تفتان کسر ءِ تولوک برانز کریسہ تفیر۔
اوفک پاریر کہ دا ریاستی ظلم و حکومت نا بے حسی نا برخلاف برانز ءِ۔
برانزی تا پاننگ ئس کہ بنجاہی کسر نا تفنگ، غنی بلوچ نا خاہوت نا پارہ غان پر امن برانزی عمل نا لڑ ءِ، ہرا اسہ تو اسیٹی جتاء دروشم تیٹ برجاء ءِ، اوفک خبڑدار کریر کہ دا برانز ئٹ پین ترندی ہتنگو ہراتم اسکان کہ غنی بلوچ راہبندی حق تننگ مفک۔
برانزیک مستی پاریر کہ اگہ غنی بلوچ ءِ دمدستی یلہ کننگتو گڑا دا ظلم ئنا برخلاف پین توار ارفنگو و برانز آتا دروشم تیٹ ترندی ہترنگو۔
ولدا ہندی کالخواک خاہوت تون سلاہ غان گڈ کسر ءِ ہن و بر کن یلہ کرفیر۔ خاہوت برانز ءِ پر امن وڑ ئٹ ایسر کرسہ غنی بلوچ نا دمدستی یلہ کننگ نا خواست کرے۔