زیشان زہیر نا خون
ٹی بی پی سرگپ
بلوچستان ئٹ دنو اسہ دے اس ہم گدرینگپک ہراڑے ریاستی زوراکی نا گواچی بندغ آک اسہ پوسکنو تادی ئسے نا گواچی مفس۔ پنجگور نا ہندی زیشان زہیر نا کسہ ہم اسہ اندنو ایسر مفروک تدینی ئسے نا پوسکنو لڑ ئسے۔ زیشان نا باوہ، زہیر بلوچ ءِ سینزدہ اپریل 2015 ٹی زوراکی ئٹ بیگواہ کننگا، ہموتم زیشان بیرہ یانزدہ سال نا چُنا اس ئس۔ چنکی، و ورنائی نا دا نہادی آ سال تے او تینا باوہ نا یلہ کننگ کن کسر تیا برانز کریسہ و توار ارفسہ گدارا۔ داڑاسکان کہ 29 جون 2025 آ ریاستی ڈیتھ اسکواڈ آک اودے پنجگور نا علاقہ خدابادان آن برمتہ کریر و لودے سہب ئنا اونا سُم شلوک جون خننگا۔
زیشان زہیر و اونا خاہوت ءِ ریاستی ظلم آتا برخلاف ہیت و تینا مزاحمت ءِ یلہ کپننگ نا سوب آن بھاز وار تڑی تننگاسس۔ بلوچستان ئٹ زوراکی ئٹ بیگواہیک، اشتماعی سزا نا اٹکل آک، و بیدس راہبند ریاستی بیدادی نا برخلاف توار ارفوک آتے جتا دروشم تیٹ چھپ کرفنگ نا سوگو کوشست آک برجاء ءُ، وختس تڑی، وختس بیگواہی و وختس جون۔
تدوکا توہ تیٹ بلوچستان نا جتا علاقہ تیٹی ریاستی دزگیر ئٹ زوراکی ئٹ بیگواہ بندغ آتا بیدس عدالت خون تیٹ ہم پاش ودکی مسنے۔ 28 جون آ ضلع دُکی ٹی مُسہ ورنا ءِ دروغ نا مونتس تیٹ کسفنگا، حالانکہ او بھلو وخت ئسے آن ریاستی ادارہ آتا دزگیر ئٹ ئسر۔ اوفتا چاہنداری ریحان نا مار وزیر خان سہلانی (ہشت توہ آن بیگواہ)، خمیس نا مار صحبت خان (اِرا توہ آن بیگواہ)، و وزیر احمد ڈینگنانی بزدار نا مار علی (یانزدہ توہ آن بیگواہ) نا پن ئٹ مس۔ دا جون ئنا توہ ئٹ ضلع دُکی ٹی دا ارٹمیکو دروغ نا مونتس تدینی ءِ، ہراٹی زوراکی ئٹ بیگواہ بندغ آتے کسفسہ اوفتیا مزاحمت نا دوبہ خلنگانے۔
زیشان زہیر نا خون بلوچستان ئٹ برجاء بندغی نیستی تا اسہ چرجوئی ئسے، ہراڑے اسہ بندغ ئسے آخہ بلکہ تیوہ چاگڑد نا اشتماعی مزاحمت ٹک مننگسہ ءِ۔ زوراکی ئٹ بیگواہ بندغ آتا خاہوت آک اِرا تکلیف تون مون تریسہ ءُ، اسہ پارہ غان او تینا بندغ آتا یلہ مفننگ نا ڈکھ ءِ سگنگ ءُ، گڑا ارٹمیکو پارہ غان ریاستی بیر ئتون ہم مون تننگ ءُ۔