موغادیشو: صومالیہ نا پنی صحافی عبدالعزیز محمد اسہ وت کش جلہو اسیٹی بیران مس و نیشنل ٹی وی نا ڈائریکٹر نیوز و ڈرائیور بھاز ٹپی مسر۔
جہانی خبر تروکا ادارہ تا رد ئٹ صومالیہ ٹی شدت پسند تنظیم الشباب نا سخت نغدکار صحافی و ریڈیو موغادیشو نا ڈائریکٹر عبدی عزیز محمد ریسٹورینٹ آن اُرا کن ہننگ ئسر کہ اسہ وت کش اس اوفتا گاڑی آن خڑک بریسہ تینے ترغفے۔
تراک انداخس تُرند ئس کہ گاڑی بُھس مس، گاڑی ٹی ساڑی عبدی عزیز بھاز ٹپی مس ہرا اسپتال آ دننگ نا وخت ساہ تس اندن اوفتا ڈرائیور و نیشنل ٹی وی نا ڈائریکٹر بھاز ٹپی حالیت ئٹ دوا درمان مننگ ءُ۔
جلہو نا ذمہ واری ءِ حکمران جماعت نا برخلاف شدت پسند تنظیم الشباب قبول کریسہ تینا بیان ئٹ پارے کہ الشباب نا جلہو کار آک صحافی عبدی عزیز نا پٹنگ ئٹ ئٹ توہ آن سرگڑدان ئسر۔
اسہ بیان اسیٹی صومالیہ نا نائب وزیر اطلاعات عبد الرحمان یوسف عمر پارے کہ ملک اسہ دلیر ءُ بندغ ئسے آن محروم مس۔
یاتی مرے کہ الشباب صومالیہ ٹی فوج، پولیس، سرکاری دفتر و بندغی ہند آتیا بم تراک آتیٹ اوار مسونے ہرا زیاتر مر آ علاقہ تیٹ تینا جاگہ تیان پیشن مریسہ دارالحکومت آ جلہو کیرہ۔