بھاگ سول ہسپتال ٹی آسراتی تا کمبوتی،مخلوق سختی تا گواچی

حوال تا رد ئٹ سول ہسپتال بھاگ ٹی آسراتی تا کمبوتی زالبول ڈاکٹر، دنتان سرجن، الٹرا ساونڈ مشین، ای سی جی مشین تون اوار  ایلو  ناجوڑی تا ٹیسٹ مفرینگ نا سوب آن اسہ لکھ نفوس جتا سختی تا گواچی ءِ، و دوائی تا کوٹ امو مست ئنا ءِ، ہسپتال ٹی 120 بسترہ تو ساڑی ء ولے آسراتی مفرینگ نا برابر ءِ۔

بھاگ شار و تحصیل بھاگ نا اسٹ آ ہسپتال ءِ تقریبا 18 سال آن زیات وخت گدرینگ آن بیدس زالبول ڈاکٹر تخنگتو ہرانا سوب آن زالبول آک سختی تا گواچی ءُ، چنا خننگ کیس آتیٹ زالبول تے ایمر جنسی ئٹ جیکب آباد یا کوئٹہ آ دروئی تمیک بھازی زالبول آک کسر ٹی مرگ نا گواچی مریرا اندن جیکب آباد، سبی یا کوئٹہ ہنوک خڑچ آک غریب مخلوق نا وس آن پیشن ءُ۔

اندن تحصیل بھاگ نا لکھ آتا آباتی و بلوچستان نا تیوہ آتیان زیات مست ئنا تاریخی سول ہسپتال دا وخت ویل آتا گواچی ءِ دا وخت بیرہ ڈاکٹر تینا کاریم کننگ ءُ اندن ایلو ڈاکٹر آک تینا ٹرانسفر کرینوں اندن اسٹ ٹریننگ آ ہننگ ءِ۔

ہسپتال ٹی ڈاکٹر و ایلو جاگہ آک ہم خالی ءُ۔ مخلوقی چاگڑدی حلقہ آک وزیراعلی بلوچستان، صوبائی وزیر جانجوڑی، سیکرٹری بلوچستان، صوبائی محتسب اعلیٰ، سیکر ٹری جانجوڑی، ڈی جی جانجوڑی آن خواست کرینو کہ دمدستی بنماس آ سول ہسپتال بھاگ ٹی زالبول ڈاکٹر تخیر و ایلو آسراتی تے تننگ کن گام ارفر۔