اوغانستان ٹی طالبان حکومت، دے کہی ملک و اوغانستان ٹی سول سوسائٹی نا نمائندہ غاتا نیام ئٹ مسہ دے ئی مذاکرات بناء مس۔
یک شنبے نا دے ناروے نا دارالحکومت اوسلو ٹی بناء مروکا مذاکرات ٹی طالبان وفد نا قیادت اوغانستان ٹی طالبان حکومت نا وزیرِ خارجہ امیر خان متقی کننگ ءِ۔
مذاکرات ٹی اوار مننگ کن اوغان طالبان راہشون تا 15 رُکنی وفد ہفتہ نا دے ناروے نا خصوصی طیارہ ٹی کابل آن اوسلو سر مس۔
دا مذاکرات ہندنو وخت سے آ مننگ ءِ ہرا وخت اقتصادی بحران نا رد ئٹ اوغانستان ٹی انسانی المیہ نا بیم ودی مننگ ءِ و طالبان حکومت جہان نا ایلو ملک آتیان خواست کننگ ءِ کہ اوفتا حکومت تسلیم کننگ مرے۔
اوسلو نا اسہ ہوٹل اسیٹی مروکو بند کوٹی مذاکرات نا اولیکو مرحلہ ٹی طالبان حکومت نا نمائندہ غاک اوغانستان ٹی نیاڑی و بندغی حق آتا کارکن و ناروے ٹی ساڑی اوغان کمیونٹی نا نمائندہ غاتون ہیت کرور۔
مذاکرات آن مست طالبان حکومت نا نائب وزیرِ ثقافت و اطلاعات اسہ وائس نوٹ اس ٹوئٹ کریسس کہ ہرا ٹی طالبان حکومت نا وزیرِ خارجہ نا نیمہ غان ہیت نا دا عمل ءِ خوش آئند و مثبت پاننگا و نارروے نا حکومت نا منتواری مس۔
بیان ٹی پاننگا کہ اوغان طالبان اومیت کیک کہ دا مذاکرات ٹی سہولت کاری نا ذریعہ ئٹ نارروے، طالبان حکومت و یورپی ملک آتا نیام ئٹ جوانو تعلقات کن اسہ گیٹ وے نا کارم ءِ کرو۔
خیال مرے کہ ہنوکا سال اگست ٹی اوغانستان ٹی طالبان نا کنٹرول آن پد طالبان حکومت نا دا وڑ نمائندہ وفد یا اسہ یورپی ملک نا اولیکو دورہ ءِ۔
ولے طالبان حکومت نا وفد آن داکان مست ایران، روس، پاکستان، قطر، ترکمانستان و چین نا دورہ کرینو۔