حوال تا رد ئٹ حب شارئٹی گیس ئنا بند مننگ، دیر ئنا نیستی و روزگار تفرنگ نا بر خلاف حب نا شاریک لسبیلہ پریس کلب نا مونا برانزی کیمپ خلکر و برازنی کیمپ ئٹی جتا سیاسی چاگڑدی و مذہبی جماعت آک و کاروباری بندغ آک راہشون تون اوار شاری تا بھلو کچ اس اوار مننگ آن گڈ اسٹنٹ کمشنر حب نا دفتر نا مونا برانز کریر۔
اندن برانزی مچی آن ہیت کریسہ نوید لاڈلا جی آر بلوچ، نیشنل پارٹی نا راہشون نظام رند، جمعیت نا حافظ منصور، عبداللہ آسکان، پی ٹی آئی راہشون معشوق رند، چاگڑدی راہشون علی اصغر چٹ کاروباری برادری نا راہشون نوراحمد تون اوار ایلو ہیت کریسہ پاریر کہ ہرا وخت شار ئٹی گیس ئنا نیستی زیات مس مخلوق ارا وخت ئنا ہرغ جوڑ کننگ کن سختی تا گواچی مننگ ءِ۔
اوفتا پین پاننگ اس گیس کوالخوا شار ئٹی گیںس ئنا نیستی ودی کریسہ مخلوق نا زند ءِ بھس کرینے او پاریر کہ حب ئنا ویل آتے ایسر کننگ نا کن تیوہ آ سیاسی و چاگڑدی مذہبی جماعت آک متحد ءُ، گیس ئنا وڑ شار ئٹی دیر ئنا نیستی ہم تینا جاگہ ساڑی ءِ تعلقدار محکمہ شاری تے دیر تننگ ٹی ہم بے سہب مسونے او پاریر بست و بند شار ئٹی گیس و دیر ئنا نیستی ءِ ایسر کننگ کن گام ارفے و مخلوق ءِ روزگار نا مواقع تے اگہ نہ داڑان ہم سخت برانز نا کسر افینگو برانزی مچی کیمپ ئنا جتا شخصیات آک بسر و عوامی نیشنل پارٹی نا راہشون اصغر اچکزئی لالہ منان افغان لسبیلہ بارایسوسی ایشن نا صدر مجیب الرحمن تون اوار ایلو بسر۔
ڈپٹی اسٹنٹ کمشنر حب و تحصیلدار حب نا مذاکرات سر سہب مس و تولوک برانز ایسر کننگا۔ ڈپٹی کمشنر لسبیلہ پارے کہ حب ءِ گیس کم تننگ ءِ اندن خواست آک بھاز زیات ءُ دا لڑ ئٹی ایم ڈی سوئی سدرن و ایلو کوالخواہ ء خط نوشت کننگ ء او صنعت آتے ارا تے ہوٹل آتیٹ خلوک گیس ئنا کانود آن چپ کنکشن ءِ دمدستی وڑ ئٹ بند کیر۔
اندن سوئی سدرن لسبیلہ نا ذمہ وار آفیسر آتے ذمہ واری یتر و مچ بست و بند آتے ہر منکن کمک کننگ نا پنت کیر ڈپٹی کمشنر پارے کہ ایمپلائمنٹ کمیٹی ٹہیفگانے ہرانا بھاز زوت میٹنگ مرو ہراٹی ہندی بندغ آتے صنعت آتے روزگار، حکومت بلوچستان پڑو نا رد ئٹ کم آن کم تنخواہ تا عمل اتینگ، ای او بی آئی، بلوچستان ایمپلائز سوشل سیکورٹی ٹی مزور آتا رجسٹریشن نا معاملہ تیا جائزہ الینگو اسپیشل بندغ آک و زالبول آتے روزگار تننگ نا لڑ ئٹی گام ارفینگو او پارے کہ شار ئٹی دیر ئنا پائپ لائن تا لیکچ و ایلو ویل ارے و اوفتے ایسر کروئی ء۔