بلوچستان نا ضلع سوراب ٹی پین شش بندغ مرگ نا گواچی مسر۔
گیشتر حوال تا رد ئٹ کوئٹہ کراچی بھلا کسر آ کار و ٹریلر نا ڈکھ لگنگ نا سوب آن زالبول آتون اوار شش بندغ بیران و اسہ زالبول ئس ٹپی مس۔
کوالخواک جاگہ غا سر مریسہ کہوک آ بندغ آتے و ٹپی آتے ڈی ایچ کیو اسپتال سوراب آ سر کرے و ٹپی آ نیاڑی ءِ پین دوا درمان کن کوئٹہ آ سر کریر۔ کہوکا بندغاک کوئٹہ و قلات نا ئسُر۔
یاتی مرے کہ بلوچستان نا کسر تا ویل آتیٹ ہر سال درزن تا حساب ئٹ بندغ آک مرگ نا گواچی مریرہ۔ ہندی بندغ آک دا کسر ءِ خونی کسر نا پِن ئٹ توار کیرہ۔
کوئٹہ کراچی بھلا کسر آ آسراتی تا کمبوتیک ساندہ اریر۔ تدوکا سال صوبائی حکومت میڈیکل ایمرجنسی رسپانس سینٹرز ہم جوڑ کریسُس۔
کوالخوا تا پاننگ ءِ کہ دافتا کمک آن روڈ شکست آتیٹ مرگ آک کم مننگ ء ولے بلوچستان ٹی روڈ شکست آک ہر دے نا کاریم جوڑ مسونو۔
تدوکا سال موٹروے پولیس نا اسہ رپورٹ ئسے نا رد ئٹ ہر سال شش آن ہشت ہزار بندغ بلوچستان ٹی روڈ شکست آتا گواچی مریرہ و دا ویل آک کم مننگ نا جاگہ ہر سال ودنگ ءُ۔