بلوچستان نا جتا ضلع تیٹی سم کاری و ایلو ویل ءُ تدینی تیٹ جمعی وڑ ئٹ پنچ بندغ مرگ نا گواچی و 6 ٹپی مسر اندن کوئٹہ آن اسہ بندغ ئسے نا جون خننگانے۔
گیشتر حوال تا رد ئٹ پنچ شنبہ نا دے بلوچستان نا جتا علاقہ تیٹ سم کاری نا مسہ ویل مونا بسر ہراڑے اسہ جون ئس خننگانے و روڈ شکست نا اسہ ویل اس مونا بس، اندن ذاتی جیڑہ و خاخر لگنگ نا ارا جتا تدینی مونا بسر۔
سم کاری نا اولیکو ویل اوستہ محمد سٹی پولیس تھانہ آن خڑک السیف مل ئٹ مونا بس ہراڑے سلاہ بند بندغ آتا سم کاری آن مل ئنا مالک رحمت اللہ جتک و جمعدار نوریز مستوئی پنی ءُ اِرا بندغ بیران اندن سم کاری ئٹ مسہ بندغ ٹپی مسونو۔
سم کاری نا ایلو ویل ضلع لسبیلہ نا تحصیل حب چوکی نا علاقہ گلیکسی ٹاؤن ئٹ مونا بس ہراڑے سلاء بند بندغ آک سوراب انجیرہ نا ہندی شاہد، سومار خان جتک نا مار ءِ سم کاری کریسہ کسفیر و نرار۔
اسہ پین ویل ئسیٹی ماشکیل آن خڑک نادرست بندغ آک سم کاری کریسہ غلام مصطفی مشوانی ءِ کسفیر۔
کوئٹہ نا ایب کیپ علاقہ مشرقی بائی پاس آن کوالخوا تے اسہ بندغ ئسے نا جون دوئی مس ہرادے چاہنداری کن سول اسپتال آ درینو۔ یاتی مرے کہ کوئٹہ ٹی تدوکا ہٹ دے آن جون خننگ نا لڑ برجاء ءِ داسکان جون آتیٹ اسٹ نا ہم چاہنداری کننگتنے۔
ایلو پارہ غان پنجگور آن خڑک ترندی ئٹ ہننگ نا سوب آن گاڑی چَپی مس ہراڑان تمپ ئنا ہندی شے حق پنی ءُ بندغ ئس مرگ نا گواچی مس۔
ضلع لسبیلہ ڈام بندر نا علاقہ ٹی شام ئنا وخت رہنگوک ءُ جھگی ئسے ٹی خاخر لگا، جھگی ٹی رہنگوک موسی پنی ءُ بندغ ئس ہشنگسہ ٹپی مس ہرادے دمدستی تون ہسپتال آ سر کریر۔
اندن سوئی کٹھن نا ہند آ ہجوانی بگٹی قوم ئنا بندغ آتا نیام ئٹ زمینی جیڑہ آ جنگی لٹ آتا استعمال آن ارا بندغ ٹپی۔