بلوچستان ئٹ کورونا وائرس نا تالان مننگ نا کچ 6.34 فیصد ریکارڈ، 23 پوسکنو کیس رپورٹ مسر، میڈیا کوارڈنیٹر محکمہ جانجوڑی بلوچستان ڈاکٹر وسیم بیگ نا شینک کروکا رپورٹ نا رد ئٹ بلوچستان ئٹ تدوکا 24 گھنٹہ نا نیام ئٹ کورونا وائرس نا 23 پوسکنو کیس رپورٹ مننگ آن گڈ داسکان زیمی بندغ تا کچ 35229 مسونے اندن تدوکا 24 گھنٹہ نا نیام ئٹ 53 بندغ کورونا وائرس آن جوڑ مسونو ہراڑان گڈ جمعی وڑ ئٹ جوڑ مروک آتا کچ 34672 مسر۔
رپورٹ نا رد ئٹ بلوچستان ئٹ کورونا وائرس نا فعال کیس آتا کچ 184 ءِ ہرافتیٹ 4 ناجوڑ ہائی فلو اندن 1 ناجوڑ ئس آکسیجن نا مفرنگ تون ہسپتال ئٹ دوا درمان مننگ ءُ، رپورٹ نا رد ئٹ بلوچستان ئٹ داسکان کورونا وائرس آن 373 مرگ مسونو۔