مجلس نا کماشی ءِ شیوان ادبی کاروان بلوچستان نا بنجائی چیٸرمین حفیظ مینگل کرے۔ و گچین آ مہمان بلوچستان نا پنی آ نوشتہ کار پام ادبی مجلس نا سرخیل ڈاکٹر عالم عجیب اس.
اندن اعزازی مہمان تیٹی بلوچستان نیشنل پارٹی نا بنجائی پروفیشنل سیکریٹری نزیر بلوچ، کامریڈ حمید بلوچ، راسکوہ ادبی دیوان نا مسکوئی چیٸرمین عابد سلام اسک ساڑی اسر. شونکاری نا دود آتے شیوان ادبی کاروان بلوچستان نا بنجائی حوالکار سیکریٹری پیر جان مہر ایسری تس.
مجلس نا بنا قرآن پاک نا تلاوت آن مس ہرانا ثواب آتے پیر جان مہر دوئی کرے. داکان بیدس مجلس ٹی شیوان ادبی کاروان نا کنوینر شیخ عتیق حسرت مینگل، رابطہ سیکریٹری پیر جان مہر، پام ادبی مجلس نا سنگت آغا حق نواز شاہ، مہر ادبی کاروان نا سنگت ضیاء جان فاروقی، جاوید بادینی اسک ہم بشخ الکر.
مجلس آن تران کریسہ ڈاکٹر عالم عجیب، نزیر بلوچ، عابد سلام، کامریڈ حمید بلوچ حفیظ مینگل پاریر کہ لمئی بولی تا جہانی دے نا ہڈ تننگ نا اولیکو مقصد اندادے کہ نن اسہ ایلو نا بولی و ثقافت نا تنوع اتے سرپد مرین. تینا لمئی بولی، تینا ثقافت و تاریخ نا روتہ غاتون ہم گرنچ مرین.
ہراتم اسہ ملک و خلق ئسے نا بولی یا لہجہ زندہ سلیک تو اونا ثقافت زندہ سلیک انتیکن دا اندا بولی ءِ ہرانا کمک ئٹ نن تینا بروکا نسل آتے تینا زند و بود تینا تاریخ نا باروٹ آگاہ کینہ.
اینو دنیا نا گلوبل مننگ نا سوب آن تینا زبان تیٹی نن باز ہیت کپنہ و ہر بندغ نا کوشست مریک کہ ای و کنا چناک جہانی ءُ بولی اس ہیل کین ہرانا کمک اٹ نن دنیا نا بشخ مرین ولے ننے دا گڑا ءِ یات تخوئی ءِ کہ قومی بولی و جہانی بولی تون اوار لمئی بولی نا ہیل کننگ و ترفنگ المی ءِ انتیکن اینو سائنس تینٹ دا گڑا ءِ منک کہ ہرا چنا نا بنماسی تعلیم تینا لمئی بولی ٹی مریک او زیات ذہین مریک.
او پاریر اینو بائدے ننا خوانوکا ادارہ غاک دا گڑا ءِ اجباری کیر کہ ننا اسکول آتیٹی لمئی بولی نا خواننگ و لکھنگ نا سبخ آک مریر تاکن ننا چناتا بروکا وخت رژنا مرے و ننا بولی ہم زندہ سلے.
اندن دا مجلس ٹی مشاعرہ ہم مس ہرا ٹی ڈاکٹر عالم عجیب، عابد سلام، شیخ عتیق حسرت مینگل، حفیظ مینگل، ضیاء جان فاروقی، آغا حق نوازشاہ ؤ پیرجان مہر بشخ الکر۔