حوال تا رد ئٹ ڈپٹی کمشنر مستونگ میجر رٹائرڈ محمد الیاس کبزئی نا زیر صدارت ڈسٹرکٹ ایجوکیشن گروپ نا اجلاس ہڈ تننگا، اجلاس ٹی ڈسٹرکٹ ایجوکیشن آفیسر کوالخوا الدین ساتکزئی، ڈپٹی ڈسٹرکٹ ایجوکیشن آفیسر میل سعید احمد سرپرہ، ڈپٹی ڈسٹرکٹ ایجوکیشن آفیسر فی میل عائشہ بگٹی تون اوار تیوہ آ ضلع ئٹ مچ اسکول آتا کلسٹر ایڈز و تعلقدار آفیسر آک اوار مسر۔
اجلاس ٹی تیوہ آ ضلع نا سکول آتا کلسٹر فنڈز و بروکا تعلیمی سال کن محکمہ تعلیم نا تیاری تا جائزہ الینگا۔
گیشتر حوال تا رد ئٹ ہلوک ویل آک و سختی تے ایسر کننگ کن المی گام ارفینگ نا فیصلہ کننگا و تیوہ آ ضلع ئٹ داخلہ مہم بناء کننگ نا فیصلہ ہم کننگا اجلاس ٹی سکول آتا کلسٹر ایڈ آک تینا سکول تا بابت تعلیم نا جوانی کن ارفوک گام تا بابت اجلاس ٹی ہیت مس، او وخت ہیت کریسہ ڈی ای او کوالخوا ساتکزئی محکمہ تعلیم نا پارہ غان تیوہ آ ضلع نا سکول آتے تیوہ وڑ ئٹ فعال کننگ و جوان تعلیم تننگ نا بابت پاننگا۔
ڈپٹی کمشنر میجر ر محمد الیاس کبزئی اجلاس آن ہیت کریسہ پارے کہ تعلیم آن بیدس اسہ ہم چاگڑد اس دیمروئی کننگ کپک ہرا راج آک تعلیم ءِ گچین کریر امو دیمروئی کرینو و جہان ٹی پن کٹانو او پین پارے کہ تعلیم و تعلیمی ادارہ آتا جوانی ضلعی بست و بند نا اولیکو گچینی تیٹ اوار ءِ ضلع ٹی تعلیم ءِ لس کننگ کن ہر مار و مسڑ ءِ سکول ٹی مروئی ءِ تیوہ آ ایڈ آک تینا علاقہ آتیٹ پی ٹی ایس ایم سیز و علاقہ نا بھلا و مخلوق تون اوڑدئی کریسہ اوفتے اوفتا چنا تے سکول آتیٹ شاغینگ کن پوہ کیر تاکن ہر چنا سکول ٹی شاغنگ ءِ و زیور تعلیم آن مونا ہنیسہ بروک وخت ئٹ تینا علاقہ صوبہ و ملک ئٹ جوانی کن تینا کڑدار ءِ ادا کننگ کے۔
او پارے کہ تیوہ آ سرکاری سکول آتیٹ تعلیم نا جوانی کن تیوہ آ وسائل آک کاریم اٹ ہتنگور و استاد آتا ویل تے ایسر کننگ کن دمدستی وڑ ئٹ گام ارفینگو سکول آتیٹ استاد آتا ساڑی مننگ ءِ یخینی جوڑ کننگ و ساڑی مفرینگ آ استاد آتا بر خلاف سخت قانودی کاروائی کننگو او پارے کہ مستونگ ٹی تعلیم و تعلیمی بست و بند نا جوانی کن تیوہ آ وسائل آک کاریم اٹ ہتنگور و مستونگ ءِ تعلیم نا بابت ماڈل ضلع جوڑ کننگو۔
او پین پارے تیوہ آ آفیسر آتا زور تخنگا کہ او تیوہ آ ضلع نا جتا سکول آتا زیات آن زیات ہنیسہ رپورٹ جوڑ کریسہ، ایلو اجلاس آتیٹ رادہ کننگر تاکن سکول آتیٹ ہلوک ویل آتے ایسر کننگ کن دمدستی وڑ ئٹ گام ارفینگ ءِ۔ او پارے کہ تعلیمی بست و بند نا جوانی کن اسہ وڑ ئنا ہم بے پامی سگینگ پرو و ننا بروکا وخت ئنا ودشت آتے جوان تعلیم نا حصول کن تیوہ آ وسائل آتے ہتنگ نن تیوہ آتا ذمہ واری ءِ کہ او سہی و جوان تعلیم اس الیسہ ملک و راج ئنا خذمت ءِ کننگر۔