بلوچستان نا علاقہ پشین و کچلاک ٹی روڈ شکست نا جتا ویل آتیٹ چار بندغ مرگ نا گواچی، اندن 23 بندغ ٹپی مسونو –
حوال تا رد ئٹ بلوچستان نا علاقہ پشین نا خانوزئی نا ہند آ مسافر کوچ ٹرک تون ڈک لگا ہرانا سوب آن مُسہ بندغ مرگ نا گوچی مسر، مسافر کوچ لاہور آن کوئٹہ آ ہننگ اس کہ خانوزئی نا ہند آ ویل ئنا گواچی مس۔
ریسکیو آن رسینگوک حوال تا رد ئٹ ویل ئنا سوب آن مسافر کوچ ٹی سوار مُسہ بندغ ہند آ ساہ تسر اندن 22 ٹپی مسونو، ویل ئٹی مرگ نا گواچی مروک بندغ آتا جونک و ٹپی آک ایمبولینس آتا کمک ئٹ کوئٹہ ٹی ہسپتال آ سر کننگار ہراڑے اوفتے دارو درمان تننگا۔
اندن پین حوال ئسے نا رد ئٹ کچلاک بائی پاس جلوگیر نا ہند آ ارا گاڑی ویل ئنا گواچی مسر ہرانا سوب آن اسہ زالبول اس مرگ نا گواچی اندن اسہ بندغ اس ٹپی مسونے۔
ہراڑان گڈ پولیس جون و ٹپی ءِ دمدستی وڑ ئٹ ہسپتال آ سر کرے ہراڑے المی کاروائی آن گڈ جون خائوت نا دو ٹی تننگا، پین کاروائی برجاہ ءِ۔