ہزارہ راہشون طاہر خان ہزارہ کذیت کرے، طاہر خان ہزارہ نا مرک اُست ہلنگ نا سوب آن مس۔
انسانی حق آتیکن توار ارفوک جلیلہ حیدر نا ردئٹ طاہر خان ہزارہ ءِ اُست ہلک ہرانا سوب آن اودے سنڈیمن و دوارہ سٹی ہسپتال آ دننگا ولے اوڑے ہم ڈاکٹر آتا ساڑی مفننگ نا سوب او کذیت کرے۔
یاتی مرے طاہر خان ہزارہ بلوچستان ئٹ بیگواہ مخلوق و انسانی حق آتا لتاڑنگ نابرخلاف توار ارفوک آتیان اسہ سوگوْ ءُ توار اس ئس۔ او بھاز وار بلوچستان ئٹ بندغی حق آتیکن توار ارفنگ نا سوب جیل و ایف آئی آر آتیتون مون تس واہم گڈیکو وخت اسکان او ظلم و بے دادی تا برخلاف توار ارفیسہ کرے۔
طاہر خان ہزارہ نا جوْن پگہ دو شمبے نا دے پنچ بجہ غا امام بارگاہ نچاری آن اونا گڈی ہند آ دننگو۔
طاہر خان ہزارہ نا کذیت آ تیوہ جہان آن اُست ہسونی نا درشانی مننگ ءِ۔ بلوچ سلاء بند راہشون ڈاکٹر اللہ نظر ہم اونا کذیت آ اُست ہسونی نا درشانی کریسہ پارے کہ اللہ اودے بہشت اٹ ہند ایتے و اونا پد مخلوق ءِ سگ بشخہ۔