زیارت ٹی پاکستانی فورسز آتا آپریشن ٹی دروغ نا مقابلہ نا برخلاف بلوچ یکجہتی کمیٹی اسلام آباد نا پارہ غان برانز کننگا۔ برانز ئٹ بلوچ خوانندہ تا بھلو کچ ئسے تون اوار سول سوسائٹی، سندھ و پشتون خوانندہ آک ہم اوار مسُر۔
برانز کروک آک خواست کریر کہ جہانی بندغی حق آتا ادارہ آک بندغی حق آتا پامالی نا نوٹس ہلیر انتئے کہ دا وخت بلوچستان ٹی ریاستی بے دادی زیات ءِ و بلوچ تدوکا اِرا دہ یک آن وار وار آ ریاستی زنک کشی تا گواچی ءِ، زوراکی ئٹ بیگواہی، بیدس قانود آن کسفنگ، جشوک جوْن آک و دروغ نا مقابلہ آتیٹ بے ڈوہ بیگواہ بندغ آتے بدلہ ہلِنگ نا پِن آ کسفنگ زنک ایسری ٹی بریرہ ۔
اوفتا پاننگ ئس کہ مالو آن بار تدوکا دے تیٹ پاکستانی فورسز کارندہ آک زیارت تدینی آن گُڈ مالو آن زوراکی ئٹ بیگواہ کننگوک یانزدہ بندغ ءِ دروغ نا مقابلہ ٹی شہید کریر ہرافتیان دائسکان ہفت بندغ نا چاہنداری کننگانے ہرافتا زوراکی ئٹ بیگواہی تا عدالتی دستاویز آک و سی سی ٹی وی فوٹیج ہم شاہدی کِن ساڑی ءُ۔
اوفتا پاننگ ئس کہ اسہ کُنڈان زوراکی ئٹ بیگواہی، بیدس عدالت آن کسفنگ جشوک جون آتا دوئی کننگ نا وے سَلوک بے دادی زیات ءِ و ایلو پارہ غان زیمی خاہوت آتے برانز کننگ آ ہم توننگ ءُ۔ تدوکا دے کوئٹہ ٹی بے وس چُنا و نیاڑی تون اوار برانز کروک آتا آنسو گیس و شیلنگ کننگا ہرا بھاز زیات افسوز ناک ءُ عمل ئسے ہرانا نن زیات مخالفت کینہ ۔
ایلو پارہ غان زیارت تدینی نا برخلاف کوئٹہ ٹی گورنر بلوچستان ہاؤس نا مونا برانز اینو ہم برجاء مس ۔
وائس فار بلوچ مسنگ پرسنز، نیشنل ڈیموکریٹک پارٹی، بلوچ یکجہتی کمیٹی، بلوچ ویمن فورم نا پارہ غان بیگواہ بندغ آتا خاہوت آک چار دے آن بلوچستان گورنر ہاؤس نا مونا برانز کننگو۔ پشتون سروک و باسک اسمبلی محسن داوڑ برانز ٹی اوار مریسہ ہم کوپئی کرے۔
کوئٹہ ٹی زیارت تدینی نا برخلاف برانز آ ساڑی مروک برانز کروک آک تدوکا دے پریس کلب کانفرنس کریسہ حکومت ءِ خواست آتے منِنگ کِن سئے شمبے اسکان وخت تسر۔ برانز کروک آتا پاننگ ءِ کہ سئے شمبے اسکان خواست آک پورا کننگتوس گڑا تیوہ بلوچستان ٹی برانز نا لڑ بناء کننگو ۔
برانز کروک آک حکومت بلوچستان ءِ مُسہ خواست تننگا ہرافتیٹ زیارت تدینی آ جوڈیشل کمیشن نا ٹہیفنگ، غُٹ بیگواہ بندغ آتا آجو کننگ و بیگواہ بندغ آتے دا باور کہ دوارہ اسہ ہم دزگیر کروک بندغ ءِ دروغ نا مقابلہ آتیٹ ٹِک کننگوفَس، اوار ءُ۔
ایلو پارہ غان حکومت بلوچستان برانز کروک آتا ہیت ءِ نمن مریسہ ءِ۔ تدوکا دے میڈیا ٹی ہیت ئٹ حکومت بلوچستان نا ترجمان فرح عظیم شاہ نا پاننگ ئس کہ زیارت تدینی نا باروٹ ہرا بیان مننگ ءِ او راست اف، سیکورٹی فورسز کارندہ آک وے سوب اسِٹ ءِ ہم کسفوفس۔ ترجمان نا ردئٹ برانز کروک آتیٹ ننا وزیر آک ہیت اٹی ءُ اسہ وار ہیت ہم کننگانے زیارت آپریشن ءِ جعلی مقابلہ قرار تننگ جوان اف ۔
بیگواہ بندغ آتا خاہوت آتون اوار زیارت ٹی کسفنگوک بندغ آتا اُراوالاک حکومتی دعویٰ ءِ دروغ ءُ ہیت قرار تننگ ءُ۔ برانز کروک آتا پاننگ ءِ کہ مُسہ دے آن گورنر ہاؤس نا مونا برانز برجاء ءِ و دائسکان اسہ ہم حکومت وفد آن سنجیدہ ہیت کننگ نا کوشست کننگتنے ایلو پارہ آن حکومتی وزیر آک دروغ نا پریس کانفرنس کننگ ءُ ۔
ہم کوپئی کننگ کِن بروک آتیٹ نیشنل ڈیموکریٹک موومنٹ نا چیئرمین و باسک اسمبلی محسن داوڑ، پارٹی نا بنجائی سیکٹری جنرل مزمل شاہ، صوبائی صدر احمد جان لالا اوار ئسُر ۔
پشتون راہشون دا وخت پارے کہ زیارت تدینی ریاستی دہشت گردی ئسے ہرانا مثیال ریاست آتیٹ مِلپک، زیارت نا وڑ تدینیک ہڑ دے بلوچ پشتون علاقہ آتیٹ مونا بننگ ءُ ہرافتے توننگ و اوفتا برخلاف سیاسی جہُد المی ءِ۔
محسن داوڑ نا پاننگ ئس کہ زیارت نا وڑ تدینی محکوم قوم آتے تینا جہُد آن اسُل پدی کننگ کپسہ ریاست آک دُن چلنگپسہ ریاستی بے دادی تا برخلاف بلوچ پشتون تینا جہُد ءِ برجاء تخور، ریاستی ادارہ آک بائدے کہ دافتے شرف و آزاتی ئٹ زند گدریفنگ نا حق ایتِر ۔