بلوچستان ٹی زوراکی نا بیگواہی تا لڑ شیف تمتو، پین چار بندغ زوراکی ئٹ بیگواہ کننگار ۔
ضلع ڈیرہ بگٹی نا علاقہ زین کوہ نا مشی آ دامن پدھرو آن پاکستانی فورسز آک چار کُھریا ءِ دزگیر کریسہ بیگواہ کریر۔
بلوچ ریپبلکن پارٹی تدینی نا پَک کریسہ پارے کہ پِن کروک بندغ آتا چاہنداری علی داد ولد واسو بگٹی، علی جان ولد واسو بگٹی، غوثوولد لیلا بگٹی و بجلی ولد شاہنواز بگٹی نا پِن ئٹ مسنے۔
کوالخواہ تا نیمہ غان داسکان دا باروٹ ہچو ہیت متنے واہم تدوکا منَہ دے ٹی تیوہ بلوچستان ئٹ اسہ وار پدا زوراکی نا بیگواہی تا تدینیتیٹ تُرندی خننگانے۔
سی ٹی ڈی و فورسز آتا کنڈ آن مستونگ و خاران ئٹی اُرا تا چھاپہ نا وختا فورسز آک ٹپی حالیت ئٹ مُسہ بندغ ءِ بیگواہ کریر اندن پِنکروک تومکا تدینی تیٹ تیوہ شش بندغ ءِ بیگواہ کننگا ہرافتیٹ اِرٹ ٹپی حالیت ئٹ کوئٹہ آن دوئی مسُر ولے زندہ سلتوس۔
داکان بیدس گوادر و تربت آن چُنک سَن خوانندہ آتون اوار ہشت بندغ ءِ زوراکی ئٹ بیگواہی تا گواچی کننگا، اندن کراچی آن زوراکی ئٹبیگواہی تا تدینی تا شابیت حوالک رسینگتنو۔
یاتی مرے کہ بنجائی شار کوئٹہ ٹی گورنر ہاؤس نا مونا بیگواہ آ بندغ آتا خاہوت آک تدوکا مُسہ ہفتہ آن برانز کننگ ءُ ۔ پِن کروک برانززیارت ٹی آپریشن و دروغ ئنا مونتس ئٹ مالو آن بیگواہ آ بندغ آتا خون آن گُڈ بناء مس۔
کوالخواہ تا پارہ غان برانز کروک آک بے پامی نا گواچی ءُ اندن اینو برانز آ تولوک خاہوت آک دپ درشانی ہم کریر۔