خضدار ئٹ گیسٹرو دین نا ترندی ئٹ ودکی، دا ناجوڑی آن 20 بندغ مرگ نا گواچی مسونو، شش سد آن زیات ناجوڑ بندغ آک خضدار ہسپتال ئٹ داخل ءُ۔ ضلعی کوالخوا و محکمہ جانجوڑی گیسٹرو دین نا ترندی ءِ کم کننگ کن پد مہ پد کوشست آتیٹ گٹ ءِ۔
گیشتری حوال تا رِد ئٹ خضدار ئٹ بشام نا پر و بروکا سیلاب آتیان گُڈ ناجوڑیک ترندی تون اوار خضدار نا شار و خلقی علاقہ تیٹ تالان مسونو۔ سیلاب نا نیام ئٹ کہوک آتا کچ 20 آ سر مسونے۔
12 بندغ نا مرگ خضدار ایمرجنسی ئٹ رجسٹرڈ مسونو 5 بندغ تحصیل وڈھ ئنا جتا علاقہ و مسہ مرگ تحصیل مولہ آن رپورٹ کننگانو۔ اندن گیسٹرو ناجوڑی آن زیمی 600 بندغ خضدار ہسپتال آ دننگانو۔
ٹیچنگ ہسپتال خضدار ئٹ کاریم کروکا ہیلتھ ورکر حلیم غلامانی نا پاننگ ئس کہ او خضدار ہسپتال نا شعبہ ایمرجنسی ئٹ کاریم کننگ ءِ و سیلاب نا نیام ئٹ اونا خڑک آ ہتوک اندونو 12 بندغ ئسر ہرافتا مرگ مالو آن مسوسس و اوفتے اندونو وخت ئسیا ہسپتال ءَ ایسونو کہ اوفتا دوا درمان منکن الو اونا پین پاننگ ئس کہ خضدار ایمرجنسی ٹی گیسٹرو نا شش و نیم سد آن گیش ناجوڑ بندغ آک رجسٹر مسونو ہرافک دوا درمان کننگانو و اوفک گیسٹرو نا ناجوڑی آن زیمی ئسر۔
اندن ڈپٹی کمشنر خضدار میجر ریٹائرڈ محمد الیاس کبزئی میڈیا نمائندہ غاتون ہیت کریسہ پارے کہ گیسٹرو و ملیریا آن رکھنگ کن ایمرجنسی بنماس آتیا گام آک ہرفنگسہ ءُ دا لڑ ئٹ فری میڈیکل کیمپ آک خلنگانو و دا وڑ ئنا ناجوڑ بندغ آتا دوا درمان اوفتا جند ئنا علاقہ تیٹ کننگسہ ءِ۔ ہراکا کہ اسہ حوال ئس رسینگک گڑا پی ایچ آئی و جانجوڑی ٹیم آک دمدستی تون زیمی علاقہ تیکن رادہ مریرہ۔