امریکہ تائیوان ءِ 1.1 ارب ڈالر نا سلاہ بہا کننگ نا موکل ءِ تریسہ چین ءِ غصہ تس۔
تائیوان کن امریکہ نا پارہ غان سلاہ پیکیج نا موکل آ ردعمل تریسہ چین نا پاننگ ءِ کہ امریکہ تائیوان کن سلاہ پیکیج ءِ پد بِٹے یا ورندی گام آتیکن تیار مرے۔
دا معاہدہ ئٹ ریڈار سسٹم، ہراڑان فضائی جلہوک ٹریک کننگرہ، داڑان بیدس اینٹی شپ و اینٹی ایئر میزائل آک اوار ءُ۔
تدوکا توہ امریکہ ایوان نا نمائندہ غاتا گپ ءُ تران کروک نینسی پلوسی تائیوان نا دورہ ءِ کرے۔ او 25 سال آتیٹ تائیوان آ ہنوکا تیوہ غا تیان سینئر امریکئی کارندہ ءِ۔
واشنگٹن ئٹ چین سفارت خانہ امریکہ آن دا معاہدہ ءِ ایسر کننگ نا خواست ءِ کرے و اودے پامدار کرے کہ اودے دانا ردعمل ئٹ گام ارفنگ آتون مون تروئی تمنگ کیک۔
چین سفارت خانہ نا ترجمان نا پاننگ اس کہ دا معاہدہ نا وڑ ئٹ واشنگٹن و بیجنگ نا نیام ئٹ تعلقداریک بھاز خراب زیمی مریسہ ءُ۔
او پین پاریر کہ چین دا حالیت آتا ردعمل ئٹ سخت و المی گام ہرفو۔
بیجنگ دا خودمختار جزیرہ ءِ تینا ونڈ ئس سرپد مریک و اونا پاننگ ءِ کہ اودے چین نا بنجاہ تون اوار کننگ درکار ءِ، داڑسکان اگہ دا وڑ ئٹ طاغت نا کاریم اٹ ہتوئی تمے۔
امریکہ جمعہ نا دے آ سلاہ تا دا معاہدہ نا موکل ءِ تس ولے داسہ دانا زی آ امریکئی کانگریس ئٹ ووٹنگ مرو ہراڑے تائیوان ءِ بھاز آتا مُخ تفی دوئی مرو۔