بلوچستان نا ضلع پنجگور نا تحصیل گچک ٹی پاکستانی فوج نا قافلہ ءِ بی ایل اے نا سرمچار آک بمب جلہو ئسیٹی ٹِک کریر۔
علاقائی حوال تا رِد ئٹ بمب جلہو ہموتم مس ہراتم فورسز کارندہ آتا قافلہ گچک نا علاقہ چب آن ہِننگ ئس ہراڑے سرمچار آک کسر آ بمب کڈ کریسُر۔
تراک نا سوب آن موٹر سائیکل آ مروک اِرا بندغ زیات ٹپی مسُنو ہرافتا چاہنداری فضل، جمعہ نا مار و وشدل، امیر بخش نا مار نا پِن آن مسونے۔
تراک آن گُڈ فورسزکارندہ آک علاقہ ءِ گھیرہ کریسہ پٹ و پول بناء کریر واہم دائسکان اسہ وڑ نا دزگیری ئس مونا بتنے۔
اندن جلہو نا ذمہ واری ءِ بلوچ لبریشن آرمی ارفے۔
میڈیا ءِ شینک مروکا بیان ئٹ بی ایل نا ترجمان جیئند بلوچ پارے کہ بلوچ لبریشن آرمی نا سرمچار آک پنجگور نا علاقہ گچک ئٹ چِب نا ہند آ اسہ آئی ای ڈی جلہو ئسیٹی کوزہ گیر پاکستانی فوج نا اسہ فاقلہ ئسے ٹِک کریسر، ہرانا سوب آن دژمن فوج و ڈھکوکا ادارہ تا جوڑ کروکا ڈیتھ اسکواڈ نا اِرا کارندہ بھاز ٹپی مسر۔
او پارے کہ سرمچار آک دژمن آ ہموتم جلہو کریر ہراتم کوزہ گیر فوج قافلہ نا شکل ئٹ دا علاقہ ٹی مونی گام ہرفنگ اس۔ جلہو نا دک ئٹ بروکا ہندی کارندہ غاک موٹر سائیکل آ اوفتا کمک ءِ کننگ ئسر۔ دا ہڑتوم آ بندغ آک برجاہ سال 26 اپریل آ گچک آن زالبول و چنکا چنا تا زوراکی نا بیگواہی ئٹ کوزہ گیر فوج نا کمک کروک آک مسونو اندن علاقہ ٹی بندغ آتا راشن تے کوزہ ئٹ ہلنگ، دزی و داڑیلی نا وڑ انگا ڈو آتیٹ ہم اوار مسونو۔
جئیند بلوچ پارے کہ بلوچ لبریشن آرمی دا جلہو نا ذمہ واری ءِ ہرفک۔ ننا جدوجہد کوزہ گیر فوچ ءِ تیوہ وڑ ئٹ کشنگ و اوفتا کمک کار آتا ایسری اسکان برجاہ مرو۔