بلوچستان یونیورسٹی نا خوانندہ آتا کنڈ آن اڈ تروک شطرنج ٹورنامنٹ تدوکا دے سر سہبی ئٹ ایسر مس۔ ٹورنامنٹ بست و بند نا کماشعتیق مزار بلوچ نا رد ئٹ ستمبر نا یک تاریخ آن بناء مروک گوازی یک شمبے نا دے فائنل گوازی آ ایسر مس۔ دا ٹورنامنٹ ءِ تینا کمک تینٹئٹ خوانندہ آک کرفیر و گچین وڑ ئٹ ایسری آ سر کریر۔
گڈیکو گوازی شاہ سمال بلوچ و شفیق خان نا نیام ئٹ مس ہرادے شاہ سمال بلوچ کٹیسہ داد ءِ تینا پنا کرے۔ میچ ئنا گچین آ مہمان ہیڈآف براہوئی ڈیپارٹمنٹ ڈاکٹر منظور بلوچ ئس و ایلو مہمان تیٹ ڈاکٹر حامد بلوچ و لالا منیر بلوچ اوار ئسر۔
شرفداری سند و ٹیکی تا بشخنگ آن گڈ ڈاکٹر منظور بلوچ ٹورنامنٹ ءِ اڈ تروک آتتون تران کریسہ پارے کہ دننگا سرگرمیک بائدے ادارہنا کنڈ آن مریر ولے ورنا تا کوشست آک حوصلہ ءِ بڑز کیرہ۔ دننگا سرگرمیک چرجوئی ئٹ برجاء مریر تاکہ خوانندہ آتیٹ ذہنی بیداریودی مرے۔ پروفیسر ڈاکٹر منظور بلوچ خوانندہ آتے کمک نا ہم یخین تس۔
حامد بلوچ و لالا منیر بلوچ ہم خوانندہ آتا کوشست آتا ستا ءِ کریسہ دننگا سرگرمی تے برجاء تخنگ نا پنت تسر و ودیک پاریر کہ ذہنیسرگرمی تیکن دننگا گوازی تے مونی ہتنگ المی ءِ۔
مہمانک بست و بند کماش عتیق مزار، شکیل سمالی بلوچ، علی بلوچ، انیس الرحمان بلوچ، ضیاء بلوچ، مرتضٰی بلوچ، فدا بلوچ و شکوربلوچ تون اوار ایلو غٹ ءِ سر سہب ٹورنامنٹ اڈ تننگ آ مبارک باد تسر۔